कोरोना भगाउन पूर्वी चितवनमा संसारिक पूजा

चितवन । बिश्वभर महामारीको रुपमा फैलीएको कोरोना भाईरस भगाउन यहाँ पूजा गरिएको छ । पूर्बी चितवनको खैरहनीमा कोरोना भाईरसको प्रकोप अन्त्यका लागि शनिबार संसारिक पूजा गरिएको हो । प्रकोप अन्त्यका लागि खैरहनी नगरपालिका वडा नम्बर १० शान्ति बजार र राप्ती नगरपालिका वडा नम्बर ८ भवानीबजारका स्थानीयले मिलेर पूजा लगाएका हुन् ।

रोगव्याधीले आक्रमण गरेका वेला यस्तो पूजा लगाउँदा प्रकोप हट्ने विश्वासका साथ पूजा लगाईएको स्थानीय हरिप्रसाद सापकोटाले बताउनुभयो । रोगव्याधी फैलिएको बेला अग्रजहरुले पनि संसारिक पूजा लगाउने चलन रहेको बताउँदै उहाँले भन्नुभयो “अहिलेको कोरोना भाईरसको प्रकोप अन्त्यका लागि गाउँलेहरु मिलेर पूजा लगायौं ।” वि.सं. २०१७ सालमा पनि रोगको महामारी भएका वेला संसारिक पूजा लगाईएको अग्रजहरुले बताएको सापकोटाले स्मरण गराउनुभयो ।

दुई जना पण्डितहरुले करिव ४ घण्टा लगाएर पूजा गराएका थिए । संसारिक पूजामा देवीको पूजा गर्ने गरिन्छ । पुजामा स्थानीय खेमप्रसाद दाहाल र राजु अधिकारी कर्ता रहनु भएको थियो । पूजा गाउँको नजिक फाँटमा लगाईएको थियो । पूजा लगाउने भएपछि स्थानीयले स्वतस्फुर्त रुपमा सहयोग गरेका थिए ।