पूर्वी नवलपरासीको देवचुलीका थप दुई जनामा कोरोना संक्रमण पुष्टि, दुवै भारतबाट आएका थिए

भरतपुर । पूर्वी नवलपरासीको देवचुली नगरपालिकाका थप दुई जनामा कोरोना भाईरस (कोभिड १९ं) संक्रमण पुष्टि भएको छ । भरतपुर अस्पतालक सूचना अधिकारी लिलाधर पौडेलका अनुसार देवचुली नगरपालिका १५ र ११ का २१ र १९ बर्षिय पुरुषमा कोरोना शुक्रबार पोजेटिभ देखिएको हो ।

उनीहरु गत जेठ ९ र १२ गते भारतबाट आएर देवचुली नगरपालिकाको क्वारेन्टिनमा बसेका थिए । उनीहरुको स्वास्थ्य अवस्था सामान्य छ भने स्वास्थ्यकर्मीको निगरानीमा राखिएको छ ।

भरतपुर अस्पताल कोभिड १९ प्रयोगशालामा जेठ १४ गते आएका ७३ नमूना मध्य अन्य ७१ वटाको पिसिआर परिक्षण नतिजा नेगेटिभ आएको र ती दुई जनाको पोजेडिभ देखिएको हो ।