अझै अलमलमा प्रदेश ३ को राजधानी, काँग्रेसले संसद अवरुद्ध पार्ने सङ्केत

हेटौंडा । प्रदेश ३ को आजदेखि शुरुहुने वर्षे अधिवेशनमा यो प्रदेशको स्थायी राजधानी र नाम के राख्ने भन्ने प्रकृया शुरु गर्ने अपेक्षा गरिएको थियो । तर यो अधिवेशनमा पनि प्रदेशको राजधानी र नामको विषय संसदको सूचीमा परेको छैन ।

प्रदेश ३ का सभामुख सानुकुमार श्रेष्ठकाअनुसार आजदेखि शुरुहुने अधिवेशनमा आठ वटा विषयले प्रवेश पाउने छन् । सभामुखको अध्यक्षतामा आइतबार बसेको कार्यव्यवस्था परामर्ष समितिको बैठकको निणय अनुसार यो अधिवेशनमा आठ वटा विषय लगिदैछ ।

सभामुख श्रेष्ठले प्रदेश सभा बैठकमा प्रदेश ३ को राजधानी र नामकरणको विषयले प्रवेश नपाउने तर एक हप्तापछि मात्र राजधानीको विषयलाई प्रवेश गराउन सकिने बताउनुभयो । यसअघि वर्षे अधिवेशनको सुरुमै प्रदेश राजधानी र नामकरणको प्रकृया सुरु गर्ने भनिएको थियो । सत्तारुढ नेकपाले राजधानीको विषयमा निर्णय गर्न नसक्दा प्रकृया शुरुहुन नसकेको हो । जसले गर्दा नेकपाकै सांसदहरु अलमल्लमा परेका छन् ।
प्रतिपक्षि दल नेपाली काँग्रेस भने हेटौँडालाई नै स्थायी राजधानी तोक्नुपर्ने अडानमा छ । वर्षे अधिवेशनमा यो विषयले प्रवेश नपाउने भएपछि काँग्रेस असन्तुष्ट बनेको छ । यो विषयलाई लिएर काँग्रेसले संसद अवरुद्ध गर्नसक्ने नाम उल्लेख नगर्ने शर्तमा एक काँग्रेस साँसदले बताए । यतिसम्मकी नेपाली काँग्रेशले संसद अवरुद्ध गर्न सक्ने भएकोले प्रदेश सभा सचिवालयलाई सतर्क अवस्थामा राखिएको छ । पहिलेको तुलनामा मर्यादा पालक थपिएको बताइएको छ । यसअघि हिउँदे अधिवेशनमा राजधानीको विषयले प्रवेश पाउने भनिएपनि प्रवेश नपाएपछि रुष्ट बनेका काँग्रेसका सांसदहरु वर्षे अधिवेशनमा राजधानीको विषयले प्रवेश नपाउने भएपछि संसद अवरुद्ध पार्ने सङ्केत दिएका हुन् ।
प्रदेश सभा गठन भएको एक वर्ष नाघिसक्दा समेत राजधानीको विषयले प्रवेश नपाएको भन्दै काँग्रेशले यसअघिनै संसद अवरुद्ध गर्ने चेतावनी दिईसकेको छ । प्रदेशको वर्षे अधिवेशन आज दिउँसो १ बजे बोलाइएको छ । प्रदेश ३ का प्रतिपक्षि दलका नेता इन्द्रबहादुर बानियाँले संसद अवरुद्ध गर्ने नगर्ने विषयमा अहिलेनै केही नभन्ने बताउनुभयो ।