मिडिया काउन्सिल विधेयकप्रति प्रेस युनियन चितवनको विरोध

चितवन । सरकारले ल्याउन लागेको मिडिया काउन्सिल विधेयकप्रति नेपाल प्रेस युनियन, चितवनले विरोध गरेको छ । पत्रकारहरुको अधिकार कुण्ठित गर्दै आम नागरिकको सूचनाको हकमाथिसमेत बन्देज लगाउने प्रयास गरेको, प्रेस काउन्सिल रहँदा पनि मिडिया काउन्सिलको नाममा सरकारले स्वतन्त्र पत्रकारिता माथि हस्तक्षेप गरेको प्रेस युनियन चितवनले आरोप लगाएको छ ।

सरकारले मिडिया काउन्सिल सम्बन्धि विधेयक संसदमा दर्ता गरेपछि युुनियन चितवनको बैठकले यस विषयमा आफ्नो ध्यानाकर्षण भएको जनाएको छ ।

शाखाका अध्यक्ष अनिल ढकालको अध्यक्षतामा बसेको बैठकले सरकारले पत्रकारहरुलाई कानुनी कठघरामा उभ्याउने दुस्प्रयास गरेको आरोप समेत लगाएको छ । बैठकले सरकारले ल्याउन लागेको विधेयक स्वतन्त्र पत्रकारिता र अभिव्यक्ति स्वतन्त्रतामाथिको हस्तक्षेप भएको भन्दै पत्रकार महासंघ र प्रेस युनियन केन्द्रिय समितिले गर्ने हरेक आन्दोलनमा उल्लेख्य सहभागिता जनाउने निर्णय गर्दै यसमा ऐक्यबद्धता जनाउन आम पत्रकारहरुलाई आहन समेत गरेको संघका सचिव प्रस्ताव सुवेदीले जानकारी दिनुभएको छ ।