भरतपुर कोरोना अस्पतालको अनियमितता र चोरीको मुद्दालाई लिएर कांग्रेस चितवनले आन्दोलन चर्काउने

चितवन । नेपाली काँग्रेस चितवनले भरतपुर महानगरपालिकाको नेतृत्वमा निर्माण भएको भरतपुर कोरोना विशेष (अस्थाई) अस्पतालमा भएको अनियमितता र चोरीको मुद्दालाई लिएर आन्दोलन सशक्त बनाउने निर्णय गरेको छ । काँग्रेस चितवनको आज (मंगलबार) सम्पन्न पदाधिकारी बैठकले कोरोना अस्पतालमा भएको अनियमितताका बिषयमा सडक संघर्ष नभई सामाजिक सञ्जालमा अभियान चलाउने निर्णय गरेको हो । दोषिलाई निलम्बन गरी कारवाही नगरेसम्म आन्दोलन जारी राख्ने बैठकले निर्णय गरेको छ ।

कोरोनाको त्रासको समयमा सरकारले गरेको लकडाउनलाई ध्यानमा राख्दै सामाजिक सञ्जालमार्फत आन्दोलन जारी राख्ने र सामाजिक दुरी कायम गर्दै अन्तक्रिया र बहसका कार्यक्रमहरु संञ्चालन गर्ने निर्णय भएको काँग्रेस चितवनका सचिब उत्तम जोशीले जानकारी दिनुभयो। अनियमितता र चोरी प्रकरणमाथि छानबिनका लागि जिल्ला प्रशासन र जिल्ला प्रहरी कार्यालयमा डेलिगेसन जाने निर्णय पनि कांग्रेसले गरेको जोशीले जानकारी दिनुभयो ।

यस्तै आन्दोलन सशक्त बनाउनका लागि भरतपुर महानगर अन्तर्गत काँग्रेसबाट निर्वाचित जनप्रतिनिधीलाई निर्देशन दिने तथा जिल्लाका अन्य बिपक्षी दलहरुसँग छलफल गरेर साझा धारणा बनाई अघी बढ्ने निर्णय समेत भएको उहाँले बताउनुभयो । कोरोना अस्पतालमा भएको अनियमितता र चोरी प्रकरण संवेदनशील बिषय भएकोले जिल्लाका नागरिक समाज, नागरिक अगुवा, बुद्धिजीवि पेशाकर्मी तथा व्यवसायीहरुलाई पनि घटनाको छानबिन र दोषीलाई कारबाहीको लागि आवाज उठाउन आग्रह गर्ने बैठकले निर्णय गरेको छ ।

काँग्रेस चितवनका सभापति जीतनारायण श्रेष्ठको अध्यक्षतामा बसेको बैठकले जिल्लाका सातै स्थानीय तह र ९८ वटा वडामा क्वारेन्टाइन बनाउन स्थानीय तहहरुलाई आग्रह गरेको छ । बिदेशबाट आउनेहरुको संख्या बढ्दै जाने र कोरोनाको जोखिम दिनानुदिन बढेकोले सबै निकायमा क्वारेन्टाइनको ब्यवस्था गर्न माग गरेको हो ।

राहत तत्काल वितरण गर्न पनि सम्बन्धित पक्षसँग आग्रह गरेको छ । राहत वितरणका क्रममा अनियमितता भएको सूचना आईरहेको भन्दै सर्वदीय, सर्वपक्षीय निर्णय अनुसार राहत बितरण गर्न बैठकले माग समेत गरेको छ ।