‘लकडाउन’ उल्लङ्घन गर्ने विरुद्ध कडा बन्दै प्रहरी, पक्राउ गर्दै प्रशासनमा बुझाउँदै

चितवन । कोरोना भाइरस (कोभिड–१९) नियन्त्रण र रोकथामका लागि सरकारले लागू गरेको ‘लकडाउन’ उल्लङ्घन गर्ने विरुद्ध चितवन प्रहरी कडा रुपमा प्रस्तुत हुन थालेको छ । लकडाउन उल्लङ्घन गरी सवारी साधन लिएर हिँड्ने व्यक्ति र सवारी साधन प्रहरीले नियन्त्रणमा लिएर कारवाहीका लागि जिल्ला प्रशासन कार्यालयमा बुझाएको छ ।

आज मात्रै चितवन प्रहरीले जिल्लाका विभिन्न स्थानबाट दुई सय तेइस सवारी साधन नियन्त्रणमा लिएको छ । जसमध्ये अटेर गरी जबरजस्ती लकडाउन उल्लङ्घन गर्ने पुरुष २९ जना र महिला १ जना गरी ३० जनालाई जिल्ला प्रशासन कार्यालय, चितवनमा बुझाइएको जिल्ला प्रहरी कार्यालय, चितवनका प्रवक्ता प्रहरी नायव उपरीक्षक एकनारायण कोइरालाले जानकारी दिनुभयो ।

जिल्ला प्रशासन कार्यालयले उनीहरुलाई प्रति व्यक्ति एक हजार रुपैयाँ जरीवाना गराएर छोडेको छ ।

प्रहरीले एक सय ८३ वटा मोटरसाइकल, २४ वटा स्कुटी, दुई वटा कार, दुई वटा बलेरो जीप, म्याजिक भ्यान एउटा, अटो ६ वटा, ट्रयाक्टर ३ वटा र ट्रक दुई वटा नियन्त्रणमा लिएको जनाएको छ । पक्राउ परेकाहरुलाई पहिलोपटकका लागि सुध्रिने मौका दिई पुनः गल्ती नदोहोर्याउने शर्तमा छोडिएको तथा घरबाट अनावश्यक रुपमा निश्किएका सर्वसाधारणलाई सम्झाई बुझाई घरतर्फ नै फर्काइएको पनि प्रहरी नायव उपरीक्षक कोइरालाले बताउनुभएको छ ।