राप्रपा र राप्रपा संयुक्तबीच पार्टी एकता गर्ने सहमति, थापा, राणा र लोहनी समान हैसियतका अध्यक्ष

काठमाडौं । लामो समयको कसरतलाई मूर्त रुप दिँदै राष्ट्रिय प्रजातन्त्र पार्टी (राप्रपा) र राष्ट्रिय प्रजातन्त्र पार्टी (राप्रपा) संयुक्तबीच पार्टी एकता गर्ने सहमति भएको छ । एकताको घोषणा यही फागुन २८ गते हुने जनाइएको छ ।

दुई पार्टीबीच शनिबार राति एकताको १०बुँदे सहमति भएको हो । पार्टी एकीकरण सम्बन्धी आधारपत्रमा राप्रपाका अध्यक्ष कमल थापा र राप्रपा संयुक्तका अध्यक्षद्धय पशुपतिशम्शेर राणा र डा. प्रकाशचन्द्र लोहनीले हस्ताक्षर गर्नुभएको छ ।

सहमतिअनुसार एकीकृत पार्टीको नाम राष्ट्रिय प्रजातन्त्र पार्टी (राप्रपा) रहनेछ भने कमल थापा, पशुपतिशम्शेर राणा र डा प्रकाशचन्द्र लोहनी गरी तीन जना महाधिवेशन नहुन्जेलसम्म अध्यक्ष रहनु हुनेछ । पार्टीको नीति र सिद्धान्त पूर्ण धार्मिक स्वतन्त्रतासहित सनातन धर्म सापेक्ष हिन्दु राष्ट्र, साझा संस्थाको रुपमा राजसंस्था रहने लगायत हुनेछ । अहिले राप्रपाको झण्डा नै एकीकृत पार्टीको झण्डा हुनेछ भने चुनाव चिन्ह टुंगो लागेको छैन । यसबारे पार्टीको उपयुक्त निकायबाट ६ महिनाभित्र निर्णय लिने पनि सहमति भएको छ ।

तीन अध्यक्षको हैसियत र मर्यादाक्रम समान हुने सहमति छ । उक्त सहमतिमा आगामी ढेड वर्षभित्र महाधिवेशन गर्ने भनिएको छ ।