वैशाखदेखि हेटौँडाबाट वाग्मती टेलिभिजन

हेटौँडा । वाग्मती प्रदेशको स्थायी राजधानी हेटौँडाबाट आगामी वैशाख १ गतेदेखि वाग्मती टेलिभिजन प्रसारण हुने भएको छ । सञ्चार रजिष्ट्रारको कार्यालय, हेटौँडामा आइटिआई मिडिया प्रालिका नाममा शुक्रबार वाग्मती टेलिभिजन दर्ता भएको छ ।

तीन साताभित्र परीक्षण प्रसारण र नयाँ वर्षदेखि नियमित प्रसारणको तयारीसहित काम भइरहेको वाग्मती टेलिभिजनका प्रबन्धक रामकुमार एलनले बताउनुभयो । २४सै घण्टा प्रसारण हुने टेलिभिजनले नेवारी, तामाङ, भोजपुरी, अङ्ग्रेजी र नेपाली भाषमा दैनिक १४ बुलेटिन प्रसारण गर्ने छ ।

हेटौँडामा प्रसारण स्टेसन निर्माण भइरहेको र एउटै प्रसारण गृहबाट टेलिभिजनसँगै नेटवर्क एफएम र नेटवर्क म्युजिक एफएम पनि प्रसारणमा ल्याइने कम्पनीका प्रबन्धक मनोज ढोडारीले बताउनुभयो । कम्पनीले दुवै एफमएमको पनि प्रसारण इजाजत लिइसकेको छ ।

हेटौँडाका उद्योगी, व्यवसायी, समाजसेवीसहित सर्वसाधारणको चार करोड रुपैयाँ लगानीमा वाग्मती टेलिभिजन, नेटवर्क एफएम र नेटवर्क म्युजिक एफएम प्रसारणको तयारी भएको कम्पनीका अर्का प्रबन्धक तिलक अधिकारीले बताउनुभयो । टेलिभिजनका प्रबन्धक एलनका अनुसार रेडियो र टेलिभिजनमा ३० पत्रकारसहित ७५ जनाले रोजगारी पाउने छन् ।

तस्बिर : वाग्मती टेलिभिजनको प्रसारण इजाजतपत्र दिँदै वाग्मति सञ्चार रजिष्ट्रारको कार्यालयका रजिष्ट्रार रेवती सापकोटा र प्रमाणपत्र ग्रहण गर्दैै टेलिभिजनका प्रबन्धक रामकुमार एलन ।