प्रधानमन्त्रीको स्वास्थ्यमा क्रमिक सुधार, डाक्टरले दिए कालो चिया, खान थाल्नुभयो तरल चीजहरु

काठमाडौँ । हिजो मिर्गौला प्रत्यारोपण गरिएका प्रधानमन्त्री केपी शर्मा ओलीको स्वास्थ्यमा क्रमिकः सुधार आएको छ। उहाँको हिजो त्रिवि शिक्षण अस्पतालमा दोस्रो पटक मिर्गौला प्रत्यारोपण गरिएको थियो ।

प्रधानमन्त्री ओलीले आज बिहान कालो चिया पिउनु भएको रक्षामन्त्री ईश्वर पोखरेलले सञ्चारमाध्यमलाई जानकारी दिनुभएको छ। रक्षामन्त्री पोखरेलले भन्नुभएको छ– ‘मैले चिकित्सकसँग कुराकानी गरेको थिएँ, प्रधानमन्त्रीले बिहान कालो चिया पिउनु भयो भन्नु भएको छ ।’

प्रधानमन्त्री ओलीका प्रेस सल्लाहकार सूर्य थापाले प्रधानमन्त्रीले तरल चीजहरु खान थाल्नुभएको र अन्य सूचकहरु राम्रो रहेको जानकारी दिनुभयो । हाल उहाँलाई शल्यक्रिया कक्षबाट प्रत्यारोपण उपचारकक्षमा राखी उपचारलाई निरन्तरता दिइएको छ । उहाँको पछिल्लो स्वास्थ्यस्थतिबारे अस्पतालले हरेक दिन दिउँसो ४ बजे औपचारिक जानकारी दिनेछ । प्रधानमन्त्री ओली मिर्गौला प्रत्यारोपणका लागि यही फागुन १९ गते अस्पताल भर्ना हुनुभएको थियो ।

प्रधानमन्त्री ओलीलाई उहाँकी भान्जी समीक्षा संग्रौलाले आफ्नो मिर्गौला दान गर्नुभएको थियो । संग्रौलाको स्वास्थ्य अवस्था पनि सामान्य रहेको चिकित्सकले बताएका छन् ।