बस दुर्घटनामा मृत्यु हुनेको सङ्ख्या चार पुग्यो, ५२ जना घाइते

हेटौंडा । मकवानपुरगढी गाउँपालिका वडा नम्बर २ शिखरकटेरी गैरीभञ्ज्याङमा हिजो भएको बस दुर्घटनामा मृत्यु हुनेको सङ्ख्या चार पुगेको छ। दुर्घटनामा गम्भीर घाइते भएका गढी ७ सुकौराका २४ बर्षीय सुरज लोको चितवनस्थित पुरानो मेडिकल कलेजमा उपचारको क्रममा मृत्यु भएको जिल्ला प्रहरी कार्यालय मकवानपुरले जनाएको छ। उनी सहित तीन जनाको हेटौंडामा उपचार सम्भव नभएपछि चितवन रेफर गरिएको थियो।

उक्त दुर्घटनामा घटनास्थलमै तीन जनाको मृत्यु भएको थियो। मृत्यु हुनेमा गढी गाउँपालिका वडा नम्बर ७ सुकौरा गेबडाँडाका २७ बर्षीय सोमबहादुर मोक्तान र ४० बर्षीय सोमबहादुर रुम्बा रहेका जिल्ला प्रहरी कार्यालय मकवानपुरले जनाएको छ । अर्का एक पुरुषको पहिचान खुलेको छैन । मकवानपुरगढीको जीतपुर भञ्ज्याङबाट सुकौरा सातकन्या जाँदै गरेको ना ३ ख ३५५६ नम्बरको जन्ती बोकेको बस अनियन्त्रित भई सडक छेउ भित्तामा ठोक्किएर पल्टिएको थियो ।

दुर्घटनामा ५२ जना घाइते भएका छन्, जसमा १८ जना महिला र ३४ जना पुरुष रहेका छन् । दुर्घटनामा घाइते भएकामा चार जनाको अवस्था गम्भीर, २२ जनाको मध्यम र २६ जनाको अवस्था सामान्य रहेको प्रहरीले जनाएको छ । घाइते मध्ये २८ जनाको हेटौंडा अस्पतालमा र बाँकीको चुरेहिल अस्पतालमा उपचार भईरहेकोमा तीन जनालाई चितवन रिफर गरिएको थियो ।