चार करोड २७ लाख मूल्यको छ किलो सुनसहित हेटौँडाबाट भारतीय नागरिक पक्राउ

हेटौँडा । त्रिभुवन राजपथको हेटौँडा–वीरगञ्ज सडकखण्डको हेटौँडा नगरपालिका–१५, रातोमाटेबाट प्रहरीले छ किलो सुनसहित एक भारतीय नागरिकलाई पक्राउ गरेको छ ।

जिल्ला प्रहरी कार्यालय मकवानपुरका प्रहरी उपरीक्षक सुशीलसिंह राठौरले सुनको अवैध कारोवार गर्ने भारत कर्नाट बस्ने ४२ वर्षीय अब्दुल मजिद अनेकललाई पक्राउ गरिएको जानकारी दिनुभयो । उक्त सुन छ किलो २ सय ८९ ग्राम ३५० मिलीग्राम रहेको पनि प्रहरी उपरीक्षक राठौरले बताउनुभयो ।

काठमाडौँबाट वीरगञ्जतर्फ जाँदै गरेको यात्रुबाहक रात्रि बसमा आज बिहान ४ः३० बजे जाँच गर्दा बसमा सवार अब्दुलले बोकेको कालो झोलामा मोटर पार्टसभित्र जडान हुने फलामको बेरिङजस्तो देखिने चार थान, फलामको पास्ताको बेरिङ दुई थान र फलामको मिट बेरिङ दुई थान पार्टभित्र लुकाइछिपाइ ल्याएको अवस्थामा उक्त सुन पक्राउ गरिएको हो ।

बरामद गरिएको सुनको आजको मूल्य करिब रु चार करोड २७ लाख, ५८ हजार ७ सय ७४ रहेको छ । थप अनुसन्धान गर्न राजश्व अनुसन्धान कार्यालय पथलैया बारा पठाइएको प्रहरीले जनाएको छ ।