सहकारीले गर्यो उद्योगमा दुई करोड रुपैयाँ लगानी, ‘गंगा’ ब्राण्डका दुग्धजन्य पदार्थ बजारमा आउँदै

पटिहानी (चितवन) । पश्चिम चितवनको पटिहानीमा रहेको गंगानगर दुग्ध उत्पादक सहकारी संस्थाले दुग्धजन्य परिकारहरु उत्पादन गर्न दुई करोड रुपैयाँ लगानी गरेको छ । सहकारीले गंगा ब्राण्डका दुग्धजन्य पदार्थ छिट्टै बजारमा ल्याउने तयारी गरेको हो ।

सहकारीले अत्याधुनिक उद्योगबाट प्रशोधित दूध, दही, पनिर, घ्यू, आईसक्रिमलगायतका दुग्धजन्य परिकारहरु चैत मसान्तभित्र बजारमा ल्याउन लागेको छ । संस्थाका अध्यक्ष कृष्णप्रसाद सापकोटाका अनुसार उद्योग स्थापना गर्न सहकारी विभागले ८५ लाख रुपैयाँको साझेदारी अन्तर्गत ६० प्रतिशत अनुदान स्वीकृत गरेको छ ।

उत्पादित वस्तुहरु प्याकिङ गरी गंगा ब्राण्डका रुपमा बिक्री गरिने अध्यक्ष सापकोटाले बताउनुभयो । यस सहकारीमा प्लान्ट मेसिन, दूध ढुवानी गर्ने सवारीसाधन समेत रहेका छन् ।

उद्योग स्थापनाका लागि सहकारीले आधुनिक नमूना गाई फार्म तथा स्रोत केन्द्र सञ्चालन गरी दैनिक दुई सयदेखि ५०० लिटर दुग्ध उत्पादन गर्ने बताएको छ । हाल ४० वटा नश्ससुधार गरिएका दुहुना गाई फार्ममा रहेका छन् ।

उद्योगले पशुपालन व्यवसायको माध्यमबाट स्वरोजगार सिर्जना तथा गरिबी निवारणमा योग्दान पु¥याउने अपेक्षा गरिएको छ । अहिले भरतपुर महानगरपालिका २२ का ६ सय एक जना किसानले उत्पादन गरेको दूध सहकारीले खरिद गर्दै आएको छ । यस सहकारीमा दैनिक पाँच हजार लिटर दूध सङ्कलन हुने गरेको छ ।

सहकारीले दैनिक एक हजार लिटर दूध र पाँच सय लिटरको दही प्याकिङ गर्ने लक्ष्य राखेका छ । बाँकी ५०० लिटरको घ्यु, पनिर, आईसक्रिमलगायतका सामग्री बनाउने लक्ष्य रहेको छ । बजार विस्तार गर्दै तीन हजार पु¥याउने लक्ष्य सहकारीले राखेको छ ।

यहाँबाट उत्पादित वस्तुहरु नवलपरासी, रुपन्देही, कास्की, तनहुँ, गोरखा धादिङ र काठमाडौँलगायतका जिल्लामा बिक्री वितरण गर्ने लक्ष्य राखेको छ । दूध र दुग्धजन्य पदार्थ उचित मूल्यमा उपलब्ध गराई पाँच वर्षभित्र राष्ट्रिय मापदण्ड स्तरको दुग्धजन्य पदार्थहरु बजारमा दैनिक १० हजार लिटर दूध प्रशोधन गरी बिक्री वितरण गर्ने लक्ष्य सहकारीको छ ।

किसानलाई दूध उत्पादनका लागि प्रोत्साहन गर्नका लागि सहकारीले नयाँ नीतिसमेत ल्याएको छ । पशु व्यवसायमा आवश्यक पर्ने औषधि सहुलियत, ऋण, घाँस दानाको उचित व्यवस्था, पशु सुत्केरी खर्चको आर्थिक भार कम गर्नको लागि प्रतिपशु एक हजार रुपैयाँ दिने व्यवस्था गरेको छ । दूध उत्पादन लागत कम गर्न पशु व्यवसायमा आवश्यक पर्ने औषधि सहुलियतरुपमा उपलब्ध गराउँदै आएको अध्यक्ष सापकोटाले बताउनुभयो ।

उद्योग स्थापना भएपछि सहकारीले प्रतिलिटर १० रुपैयाँ किसानलाई अनुदान दिन सक्ने अनुमान गरिएको छ । अहिले किसानबाट सहकारीले सरदरमा ५७ रुपैयाँमा दूध खरिद गर्दै आएको छ । उद्योग सञ्चालनपछि ६७ रुपैयाँमा खरिद गर्न सकिने बताईएको छ ।

विसं २०४९ सालमा स्थापना भएको यस सहकारीले गत आर्थिक वर्षमा १५ करोड ८ लाख, एक हजार ९ सय ७९ रुपैयाँको कारोबार गरी ६ लाख ८ हजार ६ सय २२ रुपैयाँ बचत गर्न सफल भएको थियो । चालु आर्थिक वर्षमा १९ करोडभन्दा बढीको कारोबार गर्ने लक्ष्य लिईएको छ ।

सहकारीले पशु फार्म सञ्चालन गर्न ४ विगाहा ३ कठ्ठा जग्गा भाडामा लिई सो मध्ये २ विगाहा १३ कठ्ठामा पशुका लागि आवश्यक पर्ने बहुवर्षीय, डाले र मौसम अनुसारको घाँस खेती गर्र्दै आएको छ । पटिहानीको धनौजीमा केन्द्रीय कार्यालय रहेको सहकारीले गंगानगर र बरौजीमा समेत दूध सङ्कलन केन्द्र स्थापना गरेको छ ।

सहकारीले यही फागुन १६ गते निःशुल्क पशु स्वास्थ्य शिविरको समेत आयोजना गरेको छ ।