मकवानपुरमा सवारी दुर्घटनामा छ महिनामा ४२ जनाको ज्यान गयो, ५१ गम्भीर घाइते

हेटौंडा । मकवानपुरमा सवारी दुर्घटनामा छ महिनामा ४२ जनाको ज्यान गएको छ । चालु आर्थिक वर्षको साउनदेखि पुस मसान्तसम्म मकवानपुरमा सवारी दुर्घटनामा ४२ जनाको मृत्यु भएको जिल्ला ट्राफिक प्रहरी कार्यालय मकवानपुरका प्रमुख हरि विष्णु ढकालले बताउनुभयो ।

सो अवधिमा जिल्लामा ६१ वटा सवारी दुर्घटना भएका छन् । दुर्घटनामा ५१ जना गम्भीर घाइते भएका छन् । ३९ जना सामान्य घाइते भएका जिल्ला ट्राफिक प्रहरी कार्यालय, मकवानपुरले जनाएको छ । सवारी दुर्घटनामा सबैभन्दा बढी भदौ महिनामा ११ जनाको मृत्यु भएको थियो । त्यस्तै साउन महिनामा नौ जना र पुस महिनामा नौ जनाको मृत्यु भएको छ ।

मकवानपुर ट्राफिकले यो छ महिनाको अवधिमा सवारी नियम उल्लङ्घन गर्ने ९ हजार ९ सय ९८ वटा सवारी साधनलाई कारवाही गरेको छ । सवारीका साधन कारवाहीबाट ७० लाख १८ हजार ५ सय रुपैयाँ राजस्व सङ्कलन गरेको ढकालले जानकारी दिनुभयो ।

वाग्मती प्रदेशको राजधानी बनेको हेटौँडामा जथाभावी पार्किङ गर्दा र पार्किङ व्यवस्थित बन्न नसक्दा बजारमा ट्राफिक व्यवस्थापन चुनौती बनेको छ । चालकलाई समय–समयमा ट्राफिक नियमबारे सचेतना गराउँदा पनि त्यसको कार्यान्वयन हुन नसक्नु सवारी दुर्घटनाको मुख्य कारण रहेको ढकालले बताउनुभयो ।