वाग्मतीका १३वटै जिल्लामा खेलकुद विकास समितिको नेतृत्व चयन, चितवनको अध्यक्षमा प्रह्लाद प्रधान

चितवन । वाग्मती प्रदेश सामाजिक विकास मन्त्रालय अन्तर्गतको वाग्मती प्रदेश खेलकूद विकास परिषद्ले प्रदेशका १३ वटै जिल्लाका जिल्ला खेलकूद विकास समितिलाई पूर्णता दिँदै नेतृत्व चयन गरेको छ । परिषद्ले जिल्ला खेलकूद विकास समिति चितवनको अध्यक्षमा युवा नेता प्रह्लाद प्रधानलाई चयन गरेको छ ।

जिल्लामा खेलकुद क्षेत्रको विकासमासमेत योगदान दिँदै आएका प्रधानले युवा संघ चितवनको अध्यक्षहुँदै केन्द्रीय सदस्यसमेत रहेर काम गरिसकेका छन् । चितवनमा युवाहरुबीच लोकप्रिय प्रधान नारायणगढका स्थायी वासिन्दा हुन् ।

काठमाडौँमा अरुण बस्नेत, ललितपुरमा भरतप्रसाद पराजुली, भक्तपुरमा श्रीभक्त काशीछवा, काभ्रेमा मानवीर लामा, सिन्धुलीमा खड्ग रजन मगर, मकवानपुरमा सानु लामा, धादिङमा प्रताप सिङ तामाङ, रसुवामा दावा तामाङ, नुवाकोटमा बुद्धिमान तामाङ, रामेछापमा राजेश श्रेष्ठ, दोलखामा रोहित खड्का र सिन्धुपाल्चोकमा शिव देउजालाई जिल्ला अध्यक्षमा नियुक्त गरेको वाग्मती प्रदेश खेलकूद विकास परिषद्का सदस्य सचिव सूर्य भण्डारीले जानकारी दिनुभयो ।

परिषद्को मङ्गलबार सम्पन्न बैठकले १३ वटै जिल्लाका खेलकूद विकास समितिलाई पूर्णता दिएको हो । त्यसैगरी वागमती प्रदेशअन्तर्गत रहेको वाग्मती प्रदेश खेलकूद विकास परिषद्ले सातवटै प्रदेश र वाग्मती प्रदेशमा पहिलो प्रदेशस्तरीय खेलकूद प्रतियोगिताको आयोजना गर्ने निर्णय गरेको छ । सदस्य सचिव भण्डारीले आगामी चैत २१ गतेदेखि साताव्यापी पहिलो प्रदेशस्तरीय खेलकूद प्रतियोगिता हेटौँडा र चितवनमा आयोजना गर्ने जानकारी दिनुभयो ।

तस्वीर : जिल्ला खेलकुद विकास समिति, चितवनका नवनियुक्त अध्यक्ष प्रह्लाद प्रधान ।