रत्ननगर महोत्सवमा विभिन्न खेलकुद सम्पन्न, ब्याडमिन्टनमा केवल र किरणको जोडी पहिलो

चितवन । गत पुस २५ गतेदेखि सञ्चालन भइरहेको दशौँ रत्ननगर महोत्सव अन्तर्गत मंगलबार विभिन्न खेलकुदका कार्यक्रम सम्पन्न भएका छन् । महोत्सवको बाह्रौँ दिन मंगलबार पूर्वी चितवन स्तरीय ब्याडमिन्टन तथा घैँटो फुटाइ प्रतियोगिता भएका छन् ।

ब्याडमिन्टन प्रतियोगितामा केवल न्यौपाने र किरण लामाको जोडी पहिलो हुँदै १५ हजार रुपैयाँ पुरस्कार प्राप्त गरेका खेलकुद संयोजक दिनेश कट्टेलले जानकारी दिनुभयो । पहिलो पुरस्कारको प्रायोजन सूर्या भेटेरिनरी काठमाडौँका सञ्चालक एवम् रत्ननगर महोत्सव अन्तर्गतका खेलकुद संयोजक दिनेश कट्टेलले नै गर्नुभएको थियो । त्यस्तै सो प्रतियोगितामा दोस्रो भएका केदार न्यौपाने र सुरज न्यौपानेको जोडीले १० हजार रुपैयाँ तथा तेस्रो भएका कपिल श्रेष्ठ र सन्देश बस्नेतको जोडीले पाँच हजार रुपैयाँ प्राप्त गर्नुभयो ।

प्रतियोगितामा १५ टिम सहभागी थिए । त्यस्तै, मंगलबार नै भएको घैँटो फुटाई प्रतियोगितामा पहिलो हुँदै सीताराम भट्टराईले पाँच हजार रुपैयाँ पुरस्कार जित्नुभयो । मंगलबार हुने भनिएको जनप्रतिनिधि र रत्ननगर महोत्सव स्टेरिङ कमिटीको डोरी तान्ने प्रतियोगिता भने रद्द भएको खेल संयोजक कट्टेलले जानकारी दिनुभयो । त्यस्तै, बुधबार झुवानी स्कुलमा अध्ययनरत फरक क्षमताभएका विद्यार्थीहरुबीच दौड प्रतियोगिता गर्ने कार्यक्रम छ ।

तीन लाख पचास हजारद्वारा महोत्सव अवलोकन
समग्र चितवनको गौरव र गरिमायम प्रस्तुति भन्ने नाराका साथ सञ्चालन भइरहेको दशौँ रत्ननगर महोत्सव २०७६ मा दर्शकहरुको उपस्थिति उल्लेख्य रहेको छ । मंगलबार बाह्रौँ दिनसम्म आइपुग्दा महोत्सव अवलोकन गर्ने दर्शकको सङ्ख्या तीन लाख ५० हजार नाघेको रत्ननगर उद्योग वाणिज्य संघका अध्यक्ष एवम् महोत्सव मूल समितिका संयोजक राजाराम रेग्मीले बताउनुभयो । मंगलबार मात्रै ५० हजार दर्शकले महोत्सवको अवलोकन गरेका रेग्मीको भनाइ छ ।

बुधबार महोत्सवमा आकर्षणको रुपमा लोक तथा दोहोरी गायक रामजी खाँणको प्रस्तुति रहने उल्लेख गर्दै अध्यक्ष रेग्मीले बुधबार महोत्सव अवलोकन गर्ने दर्शकको सङ्ख्या अझै बढ्ने बताउनुभयो । दर्शकहरुको माग र स्टल प्रदर्शकको चाहनाअनुसार महोत्सवलाई माघ ९ गतेसम्म सञ्चालन गरिदैछ । सरकारले घोषणा गरेको नेपाल भ्रमण वर्ष २०२० लाई टेवा पुर्याउने उद्देश्यले महोत्सव स्थलमा विभिन्न पर्यटकीय गतिविधि समेत सञ्चालन गरिएको महोत्सव आयोजक संस्था रत्ननगर उद्योग वाणिज्य संघका महासचिव निराजन खनालले बताउनुभयो ।