पुडासैनी आत्महत्या प्रकरण : चितवन अदालतद्वारा रवि लामिछानेसहित तीनै जनालाई सफाई (फैसलाको ठहर खण्डसहित)

चितवन । पत्रकार शालिकराम पुडासैनी आत्महत्या प्रकरणमा जिल्ला अदालत चितवनले आरोपी तीनै जनालाई सफाई दिएको छ । आत्महत्या दुरुत्साहन मुद्दाका आरोपी रवि लामिछाने, युवराज कँडेल र रुकु भनिने अस्मिता कार्कीलाई जिल्ला अदालत चितवनले सफाई दिएको हो ।

अदालतका स्रेस्तेदार रुद्रमणि गिरीले दिनुभएको जानकारी अनुसार न्यायाधीश हेमन्त रावलको ईजलासले आईतबार उक्त फैसला गरेको हो । मागदावी नपुगेकाले तीनै जनाले सफाई पाएका गिरीले बताउनुभयो ।

फैसलाअघि आज पक्ष र विपक्षकातर्फबाट बहस भएको थियो । आईतबार आरोपी तीनै जना अदालतमा उपस्थित थिए ।

गत साउन २२ गते नारायणगढ, बसपार्कमा रहेको कंगारु होटलमा पुडासैनी झुण्डिएको अवस्थामा मृत भेटिएका थिए । आत्महत्या गर्नुपूर्व पुडासैनीले मोबाइलमा रेकर्ड गरेको भिडियोमा रवि लामिछानेले आफूलाई आत्महत्या गर्न बाध्य बनाएको आरोप लगाएका थिए ।

पुडासैनीको सोही भिडियो बयानका आधारमा प्रहरीले न्यूज २४ टेलिभिजनमा ‘सीधा कुरा जनतासँग’ कार्यक्रमका सञ्चालक रवि लामिछाने र सोही कार्यक्रममा कार्यरत युवराज कँडेललाई साउन ३० गते काठमाडौँबाट पक्राउ गरी चितवन ल्याएर मुद्दा दायर गरेको थियो । सोही क्रममा कार्कीलाई पनि पक्राउ गरिएको थियो ।

भदौ ९ गते न्यायाधीश रावलकै इजलासले लामिछाने र कँडेललाई धरौटीमा र कार्कीलाई सादा तारेखमा रिहा गरेको थियो । लामिछानेलाई पाँच लाख र कँडेललाई तीन लाख धरौटीमा रिहा गरिएको थियो ।

जिल्ला अदालत चितवनबाट भएको फैसलाको ठहर खण्डको अंश :