महिला हिंसा विरुद्धको १६ दिने अभियानमा ‘चितवन राईनोज’

चितवन, १४ मंसिर । नेपाल प्रिमियम लिग (एनपिएल) को फ्रेन्चाईज क्लब चितवन राईनोज महिला हिंसा विरुद्धको अभियानमा लागेको छ । महिला हिंसा विरुद्धको १६ दिने अभियानमा राईनोज सहभागी भएको हो ।

चितवन राईनोजको प्रायोजनमा महिला हिंसा विरुद्धको सन्देशमूलक स्टिकर तयार गरी आजबाट सवारीसाधनहरुमा टाँस्न शुरु गरिएको छ । नारायणगढस्थित पोखरा बसपार्कमा आयोजित शुभारम्भ कार्यक्रममा प्रमुख जिल्ला अधिकारी गणेश अर्यालले बसमा स्टिकर टाँसेर अभियानको शुभारम्भ गर्नुभयो ।

सो अवसरमा जिल्ला प्रहरी कार्यालय चितवनका प्रमुख प्रहरी उपरीक्षक गोविन्द पुरी, चितवन राईनोजका निर्देशक एवं चितवन मेडिकल कलेजका प्रमुख कार्यकारी निर्देशक प्रताप देवकोटा, जिल्ला ट्राफिक प्रहरी कार्यालय चितवनका प्रमुख प्रहरी निरीक्षक अनिल थापा सहित यातायात व्यवसायी, सर्वसाधारण, महिला अधिकारकर्मीको उपस्थिति थियो ।

कार्यक्रममा प्रमुख जिल्ला अधिकारी अर्यालले महिला हिंसा विरुद्धको अभियानमा सबै आआफ्नो ठाउँबाट लाग्नु पर्ने बताउनुभयो । आफूहरुले अभियानका क्रममा सबै क्षेत्रमा कार्यक्रम गरेर सचेतना ल्याउने काम गरिरहेको उहाँको भनाई छ ।

सोही अवसरमा चितवन राईनोजका निर्देशक देवकोटाले चितवन राईनोज खेलमा मात्रै नभई समाजका हरेक गतिविधिमा जोडिन चाहेको बताउनुभयो ।

यातायात व्यवसायी महासंघका केन्द्रीय उपाध्यक्ष राम सुवेदीले यातायात व्यवसायी महिला हिंसाका बारेमा सधैं सचेत रहेको बताउनुभयो ।