बाह्रबिसे बजारमा झडप भएपछि कर्फ्यू लगाइयो

सिन्धुपाल्चोक । सिन्धुपाल्चोकको बाह्रबिसे नगरपालिकाले सडक मिचेर दायाँबायाँ बनाइएका घरटहरा भत्काउँदा झडप भएपछि अप्रिय घटना हुन नदिन निषेधाज्ञा (कर्फ्यू) जारी गरेको छ । प्रशासन कार्यालयले आज बिहान ८ बजेदेखि साँझ ५ बजेसम्मका लागि बाह्रबिसे बजारमा निषेधाज्ञा जारी गरेको हो ।

प्रमुख जिल्ला अधिकारी गोमादेवी चेम्जोङले बाह्रबिसे नगरपालिकाले सडक मिचेर दायाँबायाँ बनाइएका घरटहरा भत्काउँदा झडप भएपछि अप्रिय घटना हुन नदिन निषेधाज्ञा जारी गरिएको जानकारी दिनुभयो । बाह्रबिसे बजारको पूर्वतर्फ तीन सय मिटर, पश्चिमतर्फ भोटेकोशी पुल, उत्तरतर्फ इलाका प्रहरी कार्यालय र दक्षिणतर्फ क्षमादेवी जाने बाटासहितको चार किल्लाभित्र पाँच जनासम्म भेला भएर हिँडडुल गर्न नपाइने गरी निषेधाज्ञा जारी गरिएको प्रमुख जिल्ला अधिकारी चेम्जोङले बताउनुभयो ।

बाह्रबिसे नगरपालिकाले नगरपालिकाले सडक साँघुरो हुने गरी वर्षौंदेखि सडक मिचेर दायाँबायाँ बनाइएका घरटहरा भत्काउन पटकपटक सूचना जारी गरेको थियो । सूचना अटेर गरिएपछि नगरपालिकाले शुक्रबार डोजर प्रयोग गरी घर टहरा भत्काएपछि झडपसमेत भएको थियो ।