होटल व्यवसायीको तर्फबाट जनक पौडेल उपाध्यक्ष, भट्ट र बराल सदस्य उम्मेदवार

चितवन, ५ मंसिर । होटल व्यवसायी संघ चितवनले उद्योग वाणिज्य संघ चितवनको आसन्न अधिवेशनमा उपाध्यक्ष पदका लागि जनक पौडेललाई उम्मेदवार बनाउने सर्वसम्मत निर्णय गरेको छ । संघको हालै सम्पन्न बैठकले उपाध्यक्षमा पौडेल, वस्तुगत तर्फ कार्यसमिति सदस्यमा कृष्ण भट्ट र उद्योगतर्फबाट कार्यसमिति सदस्यमा इमान्दु बराललाई उम्मेदवार बनाउने निर्णय गरेको हो ।

होटल व्यवसायी संघ चितवनका अध्यक्ष कृष्ण भट्टले संघको तर्फबाट तीन जनालाई उद्योग वाणिज्य संघमा पठाउने सर्वसम्मत निर्णय गरिएको बताउनुभयो । उहाँले तीनै जनालाई विजयी गराउन सम्पूर्ण होटल व्यवसायी लाग्ने पनि बताउनुभयो ।

उपाध्यक्ष पदका उम्मेदवार जनक पौडेलले आफूलाई उम्मेदवार बनाउने होटल व्यवसायी संघप्रति धन्यवाद ज्ञापन गर्दै सम्पूर्ण व्यवसायीलाई सहयोगका लागि आग्रह गर्नुभयो । पौडेलले भन्नुभयो “व्यवसायीको नेतृत्वदायी संस्था उद्योग वाणिज्य संघमा होटल व्यवसायी साथीहरुले मलाई उपाध्यक्षमा पठाउने निर्णय गर्नुभएको छ, म संघमा आवद्ध सम्पूर्ण साथीहरुलाई धन्यवाद ज्ञापन गर्दछु ।” उहाँले उवासंघ चितवनमा आवद्ध सम्पूर्ण व्यवसायी साथीहरुलाई सहयोगका लागि अपिल समेत गर्नुभएको छ ।

आफू निरन्तर व्यवसायीहरुको हितमा लागेको भन्दै पौडेलले व्यवसायीका यावत समस्या समाधान गर्न आफ्नो उम्मेदवारी रहेको बताउनुभयो । उहाँले भन्नुभयो “अहिलेको परिस्थितिमा चितवनका व्यवसायीको धेरै समस्या छन्, तिनलाई मसिनोगरी केलाएर समाधान तर्फ लैजान मेरो उम्मेदवारी हो ।” युवा व्यवसायी पौडेल संघमा निकै चर्चित अनुहार मध्ये एक हुनुहुन्छ । संघमा उपाध्यक्ष पदको उम्मेवारी बारे उहाँको चर्चा निकै अघि बढेको छ ।

उद्योग वाणिज्य संघ चितवनको आगामी पुस १९–२१ मा नयाँ नेतृत्वको लागि अधिवेशन हुँदैछ । उक्त अधिवेशनमा व्यवसायीहरुबीच नेतृत्वमा को जाने भन्ने बहस शुरु भएको छ । संघको निर्वाचनमा प्रायः सर्वसम्मतभन्दा पनि निर्वाचनबाट नेतृत्व चयन हुँदै आएको छ ।