पर्यटक बोकेर सौराहा आउँदै गरेको बस ट्रकमा ठोकिदा दुई जनाको मृत्यु, ३१ जना घाइते

चितवन । पर्यटक बोकेर सौराहा आउँदै गरेको बस आज भरतपुर–१, रामनगरमा ट्रकमा ठोकिदा दुई जनाको मृत्यु भएको छ । दुर्घटनामा अरु ३१ जना घाइते छन् । मृतक मध्ये एक महिला र एक पुरुष रहेका तथा उनीहरुको सनाखत भइनसकेको जिल्ला प्रहरी कार्यालय चितवनले जानकारी दिएको छ ।

मृतक दुवै नेपाली रहेका प्रहरीले जनाएको छ । उनीहरुको भरतपुर अस्पतालमा उपचारका क्रममा मृत्यु भएको हो ।

घाईते मध्ये १३ जना चिनियाँ पर्यटकको चितवन मेडिकल कलेजमा र आठ जनाको पुरानो मेडिकल कलेजमा उपचार भईरहेको छ । अन्य दश जना घाईते सामान्य उपचार पछि फर्किएका छन् । गुडिरहेको ट्रकमा पछाडिबाट आउँदै गरेको पर्यटक बस आज विहान ठोक्किएको थियो ।

नारायणगढतर्फ आउँदै गरेको लु २ ख ३३०५ नम्बरको ट्रकमा पछाडिबाट आउँदै गरेको बा १ प ७८३ नम्बरको पर्यटक बस ठक्कर खाएको थियो । बस ट्रकमा ठोक्किएपछि नजिकैको घरमा ठोक्किएको थियो ।