प्रदेश ३को लघु तथा घरेलु उद्योगका उत्पादन बिक्रीका लागि भरतपुरमा बिक्री केन्द्र निर्माण गरिने

चितवन । प्रदेश नम्वर ३ का लघु, घरेलु तथा साना उद्योगबाट उत्पादित उपज बिक्रीका लागि भरतपुर–१०, प्रदर्शनीमार्गस्थित चितवन उद्योग संघको परिसरभित्र बिक्री केन्द्र निर्माण गरिने भएको छ ।

उद्योग वाणिज्य तथा उपभोक्ता हित संरक्षण निर्देशनालय मकवानपुरको स्वीकृत वार्षिक कार्यक्रम अनुसार प्रदेश नम्वर ३ का लघु, घरेलु तथा साना उद्योगको उपज बिक्रीका लागि प्रदर्शनीमार्गस्थित चितवन उद्योग संघको परिसरभित्र बिक्री केन्द्र निर्माण गर्न लागिएको हो । सो सम्बन्धी सम्झौतापत्रमा आज हस्ताक्षर गरिएको छ ।

घरेलु तथा साना उद्योग कार्यालय चितवनमा भएको उक्त सम्झौतामा उद्योग, वाणिज्य तथा उपभोक्ता हित संरक्षण निर्देशनालय प्रदेश नम्वर ३ का निर्देशक नेत्र प्रसाद भट्टराई र चितवन उद्योग संघका अध्यक्ष राजु पौडेलले हस्ताक्षर गर्नुभयो।

त्यस अवसरमा चितवन उद्योग संघका उपाध्यक्षहरु त्रिलोचन कँडेल, मदन घिमिरे, दुर्गा प्रसाद भण्डारी, गजेन्द्र अधिकारी, परियोजना व्यवस्थापक रोचक अधिकारी, प्रशाशकीय अधिकृत गोविन्दप्रसाद पौडेल, घरेलु तथा साना उद्योग कार्यालय चितवनका प्रमुख उद्योग अधिकृत रमेश कर्माचार्य, उद्योग वाणिज्य तथा उपभोक्ता हित संरक्षण निर्देशनालय मकवानपुरका अधिकृत रामप्रसाद कुश्मालगायतको उपस्थित रहेको थियो। साथै, निर्देशक भट्टराईको संयोजकत्वमा पाँच सदस्यीय अनुगमन तथा निरीक्षण समितिसमेत गठन गरिएको छ।