चितवन राईजद्वारा आयोजित ब्याडमिन्टन प्रतियोगितामा चितवन मिड प्वाईन्ट प्रथम

चितवन, १ कात्तिक । लायन्स क्लब अफ चितवन राईजले आयोजना गरेको ब्याडमिन्टन प्रतियोगितामा चितवन मिड प्वाईन्ट विजयी भएको छ । आज (शनिबार) सम्पन्न प्रतियोगितामा कृष्णपुरलाई पछि पार्दै मिड प्वाईन्ट विजयी भएको हो ।

प्रतियोगितामा लायन्स क्लब अफ चितवन मिड प्वाईन्टका सुवित राना र बलराम बैरागी प्रथम हुनु भएको छ । यसैगरी लायन्स क्लब अफ कृष्णपुरका विधान गुरुङ र डम्बर अधिकारी द्वितीय र लायन्स क्लब अफ चितवन राईजका यमबहादुर गुरुङ र अमर रायमाझी एवं लायन्स क्लब अफ चितवन मिड टाउनका प्रविन थापा र कुशल कँडेल तृतीय हुनु भएको छ । प्रतियोगिताको ग्रेस बेष्ट खेलाडी बलराम बैरागी हुनु भयो ।

प्रतियोगिताको समापन समारोहमा विजयी खेलाडी तथा क्लबका अध्यक्षहरुलाई ट्रफि र चेक हस्तान्तरण गरिएको थियो । प्रतियोगितामा प्रथम हुनेलाई ५० हजार, दोस्रो हुनेलाई २५ हजार र तेस्रो हुने दुई समूहलाई १५–१५ हजार नगदका साथमा ट्रफि प्रदान गरिएको छ । यसैगरी बेष्ट खेलाडी र विजयी क्लबका अध्यक्षहरुलाई पनि ट्रफी प्रदान गरिएको छ । भरतपुरको कबर्डहलमा भएको प्रतियोगितामा लायन्स इन्टरनेशनल डिष्ट्रिक ३२५ आर अन्तर्गतका २० टिम सहभागी भएका थिए ।

समापन समारोहमा लायन्स क्लब अफ चितवन राईजका अध्यक्ष शिरिष पन्तले धन्यवाद ज्ञापन गर्दै यो कार्यक्रमले हारजित भन्दा पनि मित्रता, एकता र आपसी भाइचारा प्रदर्शन गर्न सहयोग पुगेको बताउनुभयो । उहाँले यस्ता प्रतियोगिता आगामी वर्ष पनि नियमित गर्ने बताउनुभयो । उहाँले प्रतियोगितालाई सफल बनाउन सहयोग गर्ने सम्पूर्ण लायन्स एवं प्रयोजकहरुलाई धन्यवाद दिनुभयो ।

यस अघि आजै बिहान आयोजित उद्घाटन कार्यक्रममा लायन्स इन्टरनेशनल डिष्ट्रिक ३२५ आरका गभर्नर नवराज सापकोटाले लायन्सहरु खेल मार्फत् शारीरिक तथा मानसिक स्वास्थ्य कायम गर्दै सेवा भावमा लाग्न अघि बढेको बताउनुभयो । उहाँले लायन्सहरु सधैं सेवामा रहने भन्दै खेल मार्फत् समाजलाई सकारात्मक दिसामा लैजानु पर्ने बताउनुभयो ।

उद्घाटन कार्यक्रममा फस्ट भिडिजि प्रभाकर पण्डित, सेकेण्ड भिडिजि दिपेन्द्र खतिवडा, खेलकुद विकास समिति चितवनका अध्यक्ष राजन कार्की, क्लबका पूर्व अध्यक्ष तिलक रिमाल लगायतले बोल्नु भएको थियो ।

यो प्रतियोगिताको मुख्य प्रायोजक नेपोभिट टायल रहेको छ । सहप्रायोजकमा सुख भिल्ला, अस्पताल पार्टनमा मौलाकालिका अस्पताल, एजुकेशन पार्टनमा ग्रेस ईन्टरनेशनल एजुकेशन, सहयोगी पार्टनमा जेके सिमेन्ट टायल म्याक्स र ट्रफी पार्टनमा क्राफ्ट बास्केट रहेका थिए ।

नेपोभिट टायल नेपालको पहिलो टायल उद्योग हो । स्वदेशी लगानी, स्वदेशी कच्चा पदार्थ प्रयोग गरेर नेपालमा नै उत्पादन हुने यसले सबै प्रकारका टायल उत्पादन गर्दै आएको कम्पनीका अध्यक्ष मनोज प्रसाद रौनियारले बताउनुभयो । आयात प्रतिथापन गर्दै देशलाई टायलमा आत्मनिर्भर बनाउने कम्पनीको उद्देश्य रहेको उहाँको भनाई छ ।