जेनजी आन्दोलनमा सबैभन्दा बढी रास्वपाको सहभागिता थियो : प्रवक्ता झा

काठमाडौं, ७ असोज। राष्ट्रिय स्वतन्त्र पार्टी (रास्वपा) का प्रवक्ता मनिष झाले जेनजी आन्दोलनमा आफ्नो पार्टीको सहभागिता रहेको बताएका छन्।

पार्टी केन्द्रीय कार्यालयमा आयोजित पत्रकार सम्मेलनमा बोल्दै उनले पार्टीको झन्डा नबोकी सदस्यहरूलाई आन्दोलनमा सहभागी हुन आह्वान गरिएको जानकारी दिए। उनले पूर्वकेन्द्रीय सदस्य सुमन श्रेष्ठ, केन्द्रीय सदस्यहरू गणेश कार्की, कान्तिशिखा लगायतको आन्दोलनमा सक्रिय भूमिका रहेको दाबी गरे। तुलनात्मक रूपमा जेनजी आन्दोलनमा सबैभन्दा बढी रास्वपाका कार्यकर्ताहरू सहभागी भएको उनको भनाइ छ।

झाले भने, ‘हाम्रो पार्टीमा जेनजी अहिले पनि छन्। हाम्रो प्रतिनिधि सभाको सचेतक नै जेनजी पुस्ताबाट छ। उनीहरू पनि गएका थिए। त्यो बेला केन्द्रीय सदस्य रहेकी सुमनाजी पनि गएकी थिइन्। गणेश कार्की, कान्तिशिखालगायतका केन्द्रीय सदस्यहरू, सम्भवतः अरू पार्टीको तुलनामा संख्यागत र प्रतिशतगत रूपमा हामी सबैभन्दा बढी उपस्थित थियौँ, त्यहाँ। तर, हामीले कुनै पनि ठाउँमा राष्ट्रिय स्वतन्त्र पार्टीको आन्दोलन हो, अगुवाइ हो भनेर दाबी गरेका थिएनौँ।’

उनले भदौ २३ गतेको आन्दोलनमा पार्टीको सहभागिता रहे पनि २४ गतेको घटनामा भने सहभागी नभएको दाबी गरे। २४ गतेको घटनामा सहभागी हुन पार्टीले कुनै आह्वान नगरेको र आगजनी तथा लुटपाट पार्टीको सिद्धान्त नभएको उनले बताए। उनले उक्त घटनाको छानबिन गर्नुपर्नेमा जोड दिए।