प्रदेशको स्थायी राजधानी हेटौंडा र नाम वागमति राख्नेमा नेकपाभित्र सहमति बन्दै, संसदमा पनि सर्वसहमतीको प्रयास

हेटौंडा । सत्तारुढ नेकपाको प्रदेश ३ का प्रमुख सचेतक रामेश्वर फुयाँलले प्रदेशको स्थायी राजधानी हेटौंडा र नाम बागमति राख्नका लागि प्रदेशसभामा नेकपा एक मत भएर अगाडि बढ्ने बताउनुभएको छ । न्यूजभित्तोसँग कुरा गर्दै उहाँले स्थायी राजधानी हेटौंडा कायम गरेर नाम वागमती राख्नेमा नेकपाका सवै साँसद एक हुने बताउनुभयो ।

प्रदेश राजधानी हेटौंडा कायम गर्न नेकपाभित्र एक मतले अगाडि बढ्ने प्रयास जारी छ । यसै विषयलाई लिएर नेकपा प्रदेश ३ संसदीय दलको बैठक आज पाँचौँ दिन पनि बसेको छ । आजको बैठकले प्रदेशको स्थायी राजधानी र नामका विषयमा निर्णय गर्ने तयारी गरेको बताइएको छ ।

नेकपाका प्रमुख सचेतक फुयाँलले प्रमुख प्रतिपक्षी दल नेपाली काँग्रेसलगायत प्रदेश संसदमा प्रतिनिधित्व गरेका दलहरुसँग पनि सर्वसहमतीको प्रयास भईरहेको जानकारी दिनुभयो । ‘स्थायी राजधानी र नामकरणका विषयमा दलहरुसँग सर्वसहमती गर्ने र नेकपाभित्र एकमत हुने प्रयास भइरहेको छ । सर्वसहमतीको प्रयासका लागि अनौपचारिक रुपमा दलहरुसँग छलफल चलाइएको छ’ उहाँले भन्नुभयो ।