दिउँसै दराज फुटाएर १३ तोला सुन र डेढलाख नगद चोरी

चितवन । भरतपुर महानगरपालिका वडा नम्वर–३, नौघरेमा घरमा मानिस नभएको मौका छोपी १३ तोला सुन र डेढ लाख रुपैयाँ नगद चोरी भएको छ । चोरले स्थानीय सूर्यबहादुर बस्नेतको घरमा मानिस नभएको मौका छोपी हिजो दिउँसो ४ बजेतिर नगद र गरगहना चोरी गरेको हो ।

बस्नेतले आफु घरमा नभएको र श्रीमती मनु बस्नेत पनि कामले घरबाट बजार गएको मौका छोपी चोरले घरको तेस्रो तलाको चाबी खोलेर दराज फुटाई नगद डेढ लाख रुपैयाँ र १३ तोला सुनका गरगहना चोरी गरेको बताउनुभयो । श्रीमती मनु साढे दुई बजे घरबाट बजार जानुभएको र साँझ सवा पाँच बजे घर फर्किदा चोरी भएको देखेपछि प्रहरीलाई खबर गरेको सूर्यबहादुरले जानकारी दिनुभयो ।

चोरले पूजा कोठामा रहेको साँचो पत्ता लगाएर ढोकाको चाबी खोलेर दराज फुटाई चोरी गरेको पनि उहाँले बताउनुभयो । चितवन प्रहरीले घटनाबारे अनुसन्धान भइरहेको बताएको छ ।