महालक्ष्मी सुगर मिलले किसानलाई तिर्यो ११ करोड २६ लाख, आजदेखि सञ्चालनमा आउने

सर्लाही । सर्लाहीको गोडैता नगरपालिका–६ बगदहमा रहेको महालक्ष्मी सुगर मिल सञ्चालनमा आउने भएको छ । किसानलाई भुक्तानी गर्नुपर्ने गत वर्षको बक्यौता रकम मिल सञ्चालक वीरेन्द्र कनौडियाले हिजो बैंकमा जम्मागरिदिएपछि सुगर मिल आजदेखि सञ्चालनमा आउन लागेको हो ।

सञ्चालक कनौडियाले ११ करोड २६ लाख रुपैयाँ भुक्तानीका लागि बैंकमा जम्मा गरिदिनुभएको थियो । गोडैता नगरपालिका प्रमुख देवेन्द्रकुमार यादवले सञ्चालकले किसानको पाउनुपर्ने रकम जम्मा गरिदिएपछि मिल सञ्चालनमा आउने जानकारी दिनुभयो ।

सो मिलले किसानको करीब २१ करोड रुपैयाँ भुक्तानी गर्न बाँकी रहेको जनाइएको छ । “किसानको खातामा बुधबारदेखि पैसा भुक्तानी हुन्छ”, उहाँले भन्नुभयो, “किसानको खातामा पैसा राख्ने भएपछि उद्योग पनि आजदेखि सञ्चालन हुन्छ ।”