रिमाल समाज चितवनमा गंगाधरको नेतृत्वमा १३ सदस्यीय नयाँ समिति

चितवन, ८ भदौ । रिमाल समाज चितवनको नवौं साधारण सभा तथा तेस्रो अधिवेशनले गंगाधर रिमालका अध्यक्षतामा नयाँ समिति चयन गरेको छ । शनिबार प्रेमबस्तीस्थित नवराज रिमाल (शास्त्री) को घरमा सम्पन्न अधिवेशनले १३ सदस्यीय नयाँ समिति सर्वसम्मत चयन गरेको हो ।

समितिको उपाध्यक्षमा विष्णु कुमारी (पौडेल) रिमाल, सचिवमा अर्जुन रिमाल, कोषाध्यक्षमा भानुभक्त रिमाल रहनुभएको छ । यसैगरी सदस्यहरुमा वसन्त रिमाल, चिरञ्जीवि रिमाल, जुनतारा रिमाल, बालकृष्ण रिमाल, प्रेम बहादुर रिमाल, शिबहरि रिमाल, अमृत रिमाल, मञ्जु कुमारी रिमाल र दुर्गा रिमाल रहनुभएको छ ।

निवर्तमान अध्यक्ष लालु शर्मा रिमालका अध्यक्षतामा भएको उद्घाटन सत्रमा समाजका केन्द्रीय सदस्य हरिदत्त रिमाल, निर्वाचन मण्डलका संयोजक नारायण प्रसाद उपाध्याय रिमाल, पत्रकार तिलक रिमाल लगायतले रिमाल समाजको गठन र यसले गर्दै आएको कामको बारेमा प्रकाश पार्नुभएको थियो ।

विभिन्न जिल्लाहरूबाट बसाइँसरी चितवनमा बसोबास गर्दै आउनुभएका रिमाल बन्धुहरूको साझा संस्था रिमाल समाज हो । रिमाल समाज चितवन औपचारिक रुपमा आठ वर्ष तथा अनौपचारिक रूपमा करिब १३ वर्ष अघिदेखि गठन भई काम गर्दै आएको छ ।

चितवन जिल्लामा बसाईसरी आउनु भएका रिमाल बन्धुहरूको सुख दुख र हकहितका लागि आफ्नै कौशिका गोत्रधारी घर परिवार संगठित भई सुरुवातमा १०–१२ घरधुरीबाट समाज स्थापना गरिएको थियो । हालसम्म आइपुग्दा करिब ३५ घरधुरीको सहभागितामा रिमाल समाज चितवन गठन भएको छ । रिमाल समाज चितवन केन्द्रीय समाजसँग आबद्ध रहँदै जिल्ला प्रशासन कार्यालयमा दर्ता भई विधिवत रुपमा अगाडि बढिरहेको छ ।

समाजको नेतृत्वमा कुल पूजा समेत हुँदै आएको छ । कूल मन्दीर निर्माणका लागि समाजले चितवनको भण्डारामा जग्गाको पनि व्यवस्थापन गरेको छ । सोही ठाउँमा मन्दिर निर्माण गरी आगामी दिनमा थप व्यवस्थित रुपमा कूल पूजा गर्ने तयारी समाजले गरेको छ ।

समाजले एउटा कोष समेत सञ्चालन गरेको छ । जहाँ सदस्यहरुले रकम जम्मा र ऋण लिने गर्दछन् ।