सभापतिले एकलौटी गर्नुभयो, पछिल्लो निर्णय सच्याउनुपर्छ : काँग्रेस वरिष्ठ नेता पौडेल

चितवन । नेपाली काँग्रेसका वरिष्ठ नेता रामचन्द्र पौडेलले सभापति शेरबहादुर देउवाले पछिल्लो पटक एकलौटी ढङ्गले गरेका निर्णय सच्याए मात्र पार्टी एक हुने बताउनुभएको छ । पौडेलले आज भरतपुर विमानस्थलमा पत्रकारहरुसँग ‘सभापतिले एकलौटी रुपमा पुस ११ गते गरेको निर्णय’ सच्याउनुपर्ने बताउनुभयो ।

पौडल समूहको बहिष्कारका बीच नेपाली काँग्रेसको केन्द्रीय समिति बैठकले पार्टी पदाधिकारीहरुको म्याद एक वर्ष थप गर्दै १४औँ महाधिवेशनको मिति तोकेको थियो ।

काँग्रेस वरिष्ठ नेता पौडेलले भन्नुभयो, ‘पार्टी सभापतिको कार्यशैलीप्रति म सहमत छैन, मैले प्रस्तुत गरेका सहमतिका बुँदाहरु टुङ्गो लगाउनुपर्छ, अनिमात्र पार्टी एक हुन्छ ।’ उहाँले पार्टीमा छलफल र सल्लाह गरौँला भन्दाभन्दै सभापतिले एकलौटी गरेको आरोप लगाउनुभयो ।

“पार्टीमा केही समस्या छन्”, पौडेलले भन्नुभयो, “समाधानका लागि मैले नौबुँदे एजेन्डा प्रस्तुत गरेको थिएँ, त्यसमा छलफल हुँदै गर्दा एकलौटी निर्णय भयो ।” उहाँले जीवन्त पार्टीमा साना ठूला विवाद भने भइरहने बताउनुभयो । उहाँले पार्टीलाई सुदृढ बनाउन नेता कार्यकर्ताले विकल्प खोज्ने बताउनुभयो । “म पार्टीलाई सुधार गर्दै जनताको भरोसाको केन्द्र बनाउने मिशनमा छु”, उहाँले भन्नुभयो, “विकल्प कार्यकर्ताले खोज्छन् ।”

नेतृत्वको असक्षमताका कारणले नै बलियो प्रतिपक्षको भूमिका खेल्न नसकिएको उहाँले बताउनुभयो । पौडेलले भन्नुभयो– ‘देशलाई भ्रष्टचारमुक्त र काँग्रेसलाई विकृति मुक्त बनाउन जरुरी छ ।