राष्ट्रियसभा निर्वाचनका लागि नेकपाले उम्मेदवारको टुङ्गो लगायो, यी हुन् १६जना उम्मेदवार

काठमाडौँ । सत्तारुढ नेपाल कम्युनिष्ट पार्टी (नेकपा) ले राष्ट्रियसभा निर्वाचनका लागि उम्मेदवारको टुङ्गो लगाएको छ । प्रधानमन्त्री निवास बालुवाटारमा आज विहान बसेको पार्टीको सचिवालय बैठकले १६जना उम्मेदवार तोकेको हो ।

नेकपाका प्रवक्ता नारायणकाजी श्रेष्ठका अनुसार प्रदेश एकमा अन्यबाट देवेन्द्र दाहाल, महिलाबाट इन्दु गौतम र दलितबाट गोपी अछामीलाई उम्मेदवार तोकिएको छ । प्रदेश दुईमा नेकपाले राजपासँग चुनावी तालमेल गरेको छ । जसमा नेकपाले दुईजना उम्मेदवार पाएकोमा महिलाबाट तुलसा दाहाल र दलितबाट राधेश्याम पासवानको नाम टुङ्ग्याएको छ ।

त्यसैगरि, प्रदेश ३ मा अन्यमा बेदुराम भुसाल र महिलामा गंगा बेलबासेलाई चयन गरेको छ । गण्डकी प्रदेशबाट अन्य उम्मेदवार नारायणकाजी श्रेष्ठ र महिलाबाट भगवती न्यौपानेलाई उम्मेदवार बनाउने निर्णय नेकपाले गरेको छ । प्रदेश पाँचमा अन्यबाट गोपाल भट्टराई, महिलाबाट विमला घिमिरे र अपाङ्गता भएकाबाट जगप्रसाद शर्मालाई उम्मेदवार बनाउने नेकपाले निर्णय गरेको छ ।

कर्णाली प्रदेशबाट अन्यमा मायाप्रसाद शर्मा र महिलाबाट सुनिता केसीलाई उम्मेदवार बनाउने निर्णय भएको छ भने सुदूरपश्चिम प्रदेशबाट अन्यमा तारामान स्वाँर र महिलाबाट शारदा भट्टलाई उम्मेदवार बनाउने सत्तारुढ नेकपाले निर्णय गरेको छ ।