पेस्तोल र गोलीसहित विप्लव समूहका नेता पक्राउ

भोजपुर । भोजपुर प्रहरीले नेत्रविक्रम चन्द समूहका एक नेतालाई हतियारसहित पक्राउ गरेको छ । प्रहरीले हतुवागढी गाउँपालिका–९ हसनपुरको भसुवाबाट पेस्तोल र चार राउण्ड गोलीसहित दैलेख दुल्लु नगरपालिका–२ का २७ वर्षीय वीरेन्द्रबहादुर थापालाई पक्राउ गरेको हो ।

थापाको साथबाट पेस्तोल र गोलीसहित दुई थान डायरी र पार्टीका दस्तावेज पनि नियन्त्रणमा लिइएको जिल्ला प्रहरी कार्यालय भोजपुरका प्रहरी प्रमुख नरबहादुर सलामीमगरले आज जानकारी दिनुभयो । पक्राउ परेका थापामाथि थप अनुसन्धान भइरहेको प्रहरीको भनाइ छ । इलाका प्रहरी कार्यालय घोरेटारबाट खटिएको प्रहरीले जाँच गर्ने क्रममा थापालाई पेस्तोलसहित फेला पारी नियन्त्रणमा लिएको हो ।