चितवनको रत्ननगरमा कृषि तालिम तथा अनुसन्धान केन्द्र स्थापना, तीन करोड ८० लाख रुपैयाँको लगानीमा भवन निर्माण

चितवन । नेपाल कृषि सहकारी केन्द्रीय सङ्घले चितवनको रत्ननगर– ५, टरौलीमा कृषि तालिम तथा अनुसन्धान केन्द्र स्थापना गरेको छ । तीन करोड ८० लाख रुपैयाँको लगानीमा केन्द्रको भवन निर्माण गरिएको हो। नेपाल सरकारको ८० प्रतिशत र सहकारीको २० प्रतिशत लगानीमा केन्द्रको भवन निर्माण गरिएको हो ।

नेपाल कम्युनिष्ट पार्टी (नेकपा)का अध्यक्ष एवम् पूर्व प्रधानमन्त्री पुष्पकमल दाहाल ‘प्रचण्ड’ले बिहीबार कृषि तालिम तथा अनुसन्धान केन्द्रको नवनिर्मित भवनको उद्घाटन गर्नुभयो । त्यस अवसरमा उहाँले सहकारीले साना र आधारभूत तहमा काम गर्ने किसानलाई प्राथमिकतामा राख्नुपर्ने धारणा राख्नुभयो । उत्पादनको महाअभियानमा सबै किसानलाई समावेश गर्नुपर्ने र कृषि पेशालाई व्यवस्थित र मर्यादित बनाउँदै उत्पादन बढाएर अर्थतन्त्र बलियो बनाउनुपर्नेमा उहाँले जोड दिनुभयो ।

सार्वजनिक, निजी र सहकारीको सहकार्यबाट मात्रै नेपालको आर्थिक विकास सन्तुलितरुपमा अघि बढ्ने धारणा राख्दै अध्यक्ष दाहालले पार्टी र सरकार दुवैले सामाजिक न्यायसहितको समाजवादको आधार तयार गर्ने र किसानलाई आत्मनिर्भर अर्थतन्त्रको पक्षमा काम गर्न अग्रसर बनाउँदै लगेको बताउनुभयो । समाजमा पछि परेका समुदायलाई सङ्गठित गर्दै वृद्धि विकाससँगै सामाजिक र आर्थिक विकासको मूल धारमा ल्याउन सहकारीले महत्वपूर्ण भूमिका खेलेको उहाँले बताउनुभयो ।