होली भिजनमा वक्तृत्वकला प्रतियोगिता

भरतपुर १५ जेठ । नेपाल अर्बुद रोग निवारण संस्था, चितवन शाखाको आयोजनामा सुर्तिजन्य उद्योगको आकर्षक चाल: प्राणघातक असर चिरौँ यो मोहजाल भन्ने शीर्षकमा वक्तृत्वकला प्रतियोगिता बुधबार होली भिजन पब्लिक स्कुलमा सम्पन्न भएको छ ।

विश्व धुमपान रहित दिवस २०२५ को अवसरमा आयोजित वक्तृत्वकला प्रतियोगिता आरुषी कार्की प्रथम, प्रेजी ढुङ्गाना द्वितीय, रेहान्स बस्ताकोटी तृतीय भएका छन् । प्रतियोगितामा प्रथम, द्वितीय र तृतीय हुनेले क्रमश ३ हजार, २ हजार र १ हजार प्राप्त गरेका छन् ।

कार्यक्रमको समुद्घाटन गर्दै प्रमुख अतिथि प्याब्सन भरतपुरका अध्यक्ष एवम् होली भिजन पब्लिक स्कुलका प्राचार्य मीनराज बस्ताकोटीले विद्यार्थीहरुलाई चेतनशील बनाएर अगाडि बढाएका कार्यक्रमहरु प्रभावकारी हुने बताउँदै विद्यार्थीहरु चेतनाका संवाहक भएर अगाडि बढ्नुपर्ने आवश्यकता औँल्याउनुभयो ।

नेपाल अर्बुद रोग निवारण संस्था, चितवन शाखाका अध्यक्ष गोविन्द पौडेलको अध्यक्षतामा सम्पन्न वक्तृत्वकला प्रतियोगितामा विद्यालयका सह प्राचार्य वेगनाथ गैरे, नेपाल रेडक्रस सोसाइटी उपशाखा लङ्कुका अध्यक्ष बद्रीनाथ पोख्रेल, विद्यालयका +२ संयोजक सिके बस्ताकोटी लगायतले मन्तब्य ब्यक्त गरेका थिए।
कार्यक्रमको निर्णायकमा प्रा डा होमनाथ सापकोटा, बद्रीनाथ पोख्रेल, ओमप्रकाश पोख्रेल रहनुभएको थियो।