नेकपा राप्ती नगर कमिटीले लियो सपथ, जनताको हितमा काम गर्ने अध्यक्ष लामाको प्रतिवद्धता

चितवन । नेपाल कम्युनिष्ट पार्टी (नेकपा) राप्ती नगर कमिटीले सोमबार सपथ ग्रहण गरेको छ । नगर कमिटी अध्यक्ष इमानसिहं लामा, सचिव रामचन्द्र पाठकसहित ८१ सदस्यीय नगर कमिटीलाई सपथग्रहण गराइएको हो ।

कार्यक्रमका प्रमुख अतिथि नेपाल कम्युनिष्ट पार्टीका केन्द्रिय सदस्य तथा चितवन जिल्ला इन्चार्ज कृष्णप्रसाद खनालले सपथग्रहण गराउनुभएको थियो । खनालले नगर कमिटीलाई पार्टीको सिद्धान्तअनुसार उच्च मनोबलका साथ काम गर्न आग्रह गर्नुभयो । उहाँले पार्टीलाई चलायमान बनाउन संगठन विस्तारमा लाग्न निर्देशनसमेत दिनुभयो ।

कार्यक्रममा बोल्ने नेताहरुले गुट उपगुटले पार्टीलाई क्षति पुग्ने र ब्यक्तिको राजनितिक भविष्य पनि सकिने भएकाले सचेत रहन कार्यकर्तालाई आग्रह गरे । पार्टीलाई जो कसैले निजी स्वार्थपूर्ति गर्ने हतियार बनाउन नहुने नेताहरुको भनाई थियो । त्यस अवसरमा नेकपा चितवनका अध्यक्ष यमबहादुर परियारले नगर कमिटीका पदाधिकारी तथा सदस्यहरुले संगठन विस्तार, पार्टी विरुद्ध भइरहेको गलत प्रचारको भण्डाफोर लगायतका काम गर्नुपर्ने बताउनुभयो ।

नेकपा राप्ती नगर कमिटीका अध्यक्ष इमानसिंह लामाले पार्टीलाई चलायमान बनाउँदै जनताको हितमा काम गर्ने प्रतिबद्धता जनाउनुभयो । अध्यक्ष लामाले लामो सयमदेखिको पार्टी भित्रको गतिरोध अन्त्य गर्दै पार्टीलाई जनताको मन मनमा पु¥याउन लागिपर्ने बताउनुभयो ।

कार्यक्रममा पार्टीका जिल्ला सचिव तथा प्रतिनिधि सभा सदस्य कृष्णभक्त पोखरेल, प्रदेश सचिवालय सदस्य तथा ३ नं. प्रदेशका भुमि ब्यवस्था, कृषि तथा सहकारी मन्त्री दावादोर्जे लामा, प्रदेश सचिवालय सदस्य जेएन थपलिया, प्रदेश सदस्य तथा राप्ती नगरपालिका प्रमुख प्रभा बराललगायतले मन्तव्य राख्नुभएको थियो । सपथग्रहण कार्यक्रम नेकपा राप्ती नगर इन्चार्ज मान बहादुर स्याङ्बोको अध्यक्षतामा भएको थियो ।