चितवनमा पहिलो पटक घरजग्गा, निर्माण तथा सजावट र फर्निचर मेला हुने

चितवन । आगामी माघ दोस्रो साता चितवनको भरतपुरमा पहिलो पटक घरजग्गा, निर्माण तथा सजावट र फर्निचरसँग सम्बन्धित अन्तर्राष्ट्रियस्तरका दुई वटा एक्स्पो आयोजना हुने भएका छन् । भरतपुर महानगरपालिका वडा नम्बर १० स्थित औद्योगिक प्रदर्शनीस्थलमा माघ ८ देखि ११ गतेसम्म ‘नेपाल ल्याण्ड, हाउजिङ एण्ड कन्स्ट्रक्सन एक्स्पोसँगै फर्निचर एण्ड होम डेकोर एक्स्पो’ आयोजना हुने भएको हो ।

ए एस इभेण्ट एण्ड मार्केटिङ प्रालि र इभेण्ट सोलुसन प्रालिको संयुक्त आयोजनामा दुवै मेलाको आयोजना हुन लागेको हो । पछिल्लो समय आधुनिक शैलीमा घर तथा आवासीय भवनको निर्माण तीब्र बन्दै गएको अवस्थालाई मध्यनजर गर्दै चितवनको औद्योगिक प्रदर्शनीस्थलमा मेला आयोजना गर्न लागिएको हो ।

घरजग्गा तथा निर्माण मेलामा आधुनिक शैलीका गुणस्तरीय निर्माण सामग्री र प्रविधि आकर्षण बन्ने ए एस इभेण्ट एण्ड मार्केटिङ प्रालिका प्रबन्ध निर्देशक अनिल श्रेष्ठले बताउनुभयो । ‘जगदेखि निर्माणपछिको अन्तिम सजावटसम्मका सबै सामग्री र त्यसको प्रविधिका बारेमा सर्वसाधारण, व्यवसायी र सम्बद्ध पक्षलाई जानकारी गराउन एकै छानामुनी दुई वटा मेला आयोजना गर्न लागिएको हो’ श्रेष्ठले भन्नुभयो ।

फर्निचर तथा सजावट मेलाको टाइटल स्पन्सरमा जेम फ्लोरिङ रहेको छ भने हाइटेक्स कार्पेटले मुख्य प्रायोजन गर्नेछ । त्यसैगरी दुवै मेलालाई उद्योग परिसंघ र चितवन उद्योग संघले प्रवद्र्धन गर्नेछन् । रेष्ट्रोलोजी, अधिकारी क्रिएटिभ कन्सर्न र ब्रिज एजुकेशन फाउण्डेसनले दुवै मेलालाई सहयोग गर्नेछन् ।

विलासिताबाट अपरिहार्य बन्दै गएको फर्निचर तथा सजावटका उत्पादनलाई पनि एकै पटक मेलामा आकर्षणका रुपमा समावेश गरिएको अर्को आयोजक संस्था इभेण्ट सोलुसन प्रालिका प्रबन्ध निर्देशक विजय सागर प्रधानले बताउनुभयो । चार दिनसम्म चल्ने मेलाको २० हजारभन्दा बढी मानिसले अवलोकन गर्ने आयोजकको अपेक्षा छ ।