तीन वर्षीया बालिकाको बलात्कारपछि हत्या

कञ्चनपुर । कञ्चनपुरको भीमदत्त नगरपालिका–१८, सालघारीमा आज दिउँसो तीन वर्षीया बालिकाको बलात्कारपछि हत्या भएको छ । घरमा कोही नभएको मौका छोपी स्थानीयवासी इन्द्र चुनाराले तीन वर्षीया बालिकाको बलात्कारपछि हत्या गरेको प्रहरीले जनाएको छ ।

जिल्ला प्रहरी कार्यालय, कञ्चनपुरका प्रवक्ता एवं प्रहरी नायब उपरीक्षक नरेन्द्र चन्दले अभियुक्त चुनारा पक्राउ परिसकेको बताउँदै घटनाबारे विस्तृतमा अनुसन्धान भइरहेको जानकारी दिनुभयो । अभियुक्त इन्द्रले हत्या गरिएकी बालिकाकी आमालाई करिब तीन महिनाअघि डडेल्धुराको जोगबुढाबाट विवाह गरेर ल्याएरका थिए ।

मृतक बालिकाको शव महाकाली अस्पताल भीमदत्तनगरमा राखिएको छ । “पक्राउ परेका चुनाराले अत्यधिक मदिरा सेवन गरेका छन्”, प्रहरी प्रवक्ता चन्दले भन्नुभयो, “बालिकाकी आमा सालघारीको पार्कमा दाउरा लिन गएको समयमा उसले बालिकालाई बलात्कारपछि हत्या गरेको स्वीकार गरिसकेको छ ।” अहिले महाकाली अस्पतालमा स्थानीयवासीको भीड लागेको छ ।