तीन नम्बर प्रदेशको नाम बाग्मती र स्थायी राजधानी हेटौँडा राख्ने सत्तारुढ नेकपाको निर्णय

काठमाडौँ । दुई वर्षदेखिको अन्यौललाई चिर्दै नेपाल कम्युनिस्ट पार्टी (नेकपा) ले तीन नम्बर प्रदेशको नाम बाग्मती र प्रदेशको स्थायी राजधानी हेटौँडा नै राख्ने निर्णय गरेको छ । सत्तारुढ दल नेकपाको आज बसेको सचिवालय बैठकले प्रदेश तीनको नाम बाग्मती र राजधानी हेटौंडा राख्ने सहमति गरेको हो ।

प्रदेशको नाम बाग्मती र राजधानी हेटौंडा कायम गर्नेगरी प्रदेश कमिटी तथा प्रदेशसभा दललाई निर्देशन दिने निर्णय गरेको पूर्व प्रधानमन्त्रीसमेत रहनुभएका पार्टीका वरिष्ठ नेता झलनाथ खनालले जानकारी दिनुभएको छ । अहिले हटौंडामा रहेको प्रदेशको अस्थायी राजधानीलाई स्थायी राजधानी बनाउने निर्णय भएको हो ।

प्रदेश ३ मा नेकपाको बहुमत छ । यो निर्णयसँगै अब तीन नम्बर प्रदेशको नाम बाग्मती र राजधानी हेटौँडा नै हुने पक्कापक्की भएको छ ।