सिएमसि कलेज परिसरमा पेस्तोल भेटियो : प्रहरी, फसाउन खोजियो : विद्यार्थी

चितवन । चितवन मेडिकल कलेजको कैलाशनगरस्थित कलेज परिसरमा पेस्तोल भेटिएको प्रहरीले जनाएको छ । तर उक्त घटनालाई विद्यार्थीहरुले फसाउन खोजेको आरोप लगाएका छन् ।

होस्टलभन्दा बाहिर कलेजको कम्पाउण्डभित्र उत्तरपूर्वी कर्नरमा भएको टेबुलटेनिक कोर्ट नजिक बेवारिसे अवस्थामा शनिबार दिउँसो पेस्तोल भटिएको जिल्ला प्रहरी कार्यालय चितवनका सूचना अधिकारी डिएसपी एकनारायण कोईरालाले बताउनुभयो । उहाँका अनुसार मेडईन युएसए लेखिएको नम्बर १११७ को पेस्तोल र त्यसमा लाग्ने दुई राउण्ड गोली बरामद गरिएको छ ।

प्रहरीले हतियार बरामद गरेको बताईरहँदा विद्यार्थीहरुले भने फसाउने प्रपञ्च भनेका छन् । नाम गोप्य राख्ने शर्तमा एक विद्यार्थीले भने “हतियार भेटिएको भन्नु भोलि (आईतबार) को आन्दोलन विथोल्न र विद्यार्थीलाई आन्दोलनबाट अन्यत्र मोड्ने गरिएको प्रपञ्च हो ।” विद्यार्थीलाई फसाएर आन्दोलन तुहाउन कलेज प्रशासन र प्रहरी प्रशासन लागेको उनको आरोप छ ।

चितवन मेडिकल कलेजका विद्यार्थीले विगत चार महिनादेखि आन्दोलनमा उत्रिएका छन् । कलेजले असुल गरेको अवैध शुल्क फिर्ताको माग गर्दै उनीहरु आन्दोलनमा उत्रिएका हुन् । आईतबार विद्यार्थीहरुले भरतपुरमा बृहत प्रदर्शन गर्ने तयारी गरेका छन् ।