फिस्लिङ घटना : प्रहरी जवान ढकाललाई पाँच दिनको म्याद थप

चितवन । प्रहरी नियन्त्रणमा रहेका जैनिक जवानको रहस्यमय मृत्यु प्रकरणमा पक्राउ परेका प्रहरी जवान ठाकुर ढकाललाई सोमबार पाँच दिनको म्याद थप गरिएको छ । जिल्ला अदालत चितवनले पाँच दिनको म्याद दिएको हो ।

आईतबार ईच्छाकामना गाउँपालिका वडा नं. १ स्थित अस्थाइ प्रहरी पोष्ट फिस्लिङमा प्रहरी नियन्त्रणमा रहेका सेनाका जवान २८ वर्षिय राम कँडेलको रहस्यमय मृत्यु भएको थियो ।

प्रहरी पोष्ट फिस्लिङमा राखिएका उनको भाग्ने क्रममा मृत्य भएको प्रहरीले दावी गरेको छ । तर परिवारले कुटपिटबाट कँडेलको मृत्यु भएको भन्दै विरोध गर्दै आएका छन् ।

घटनापछि आईतबार परिवारका तर्फबाट प्रहरी जवान ढकाल विरुद्ध कर्तव्य ज्यान मुद्दामा किटानी जाहेरी परेको जिल्ला प्रहरी कार्यालय चितवनका डिएसपी एकनारायण कोईरालाले जानकारी दिनुभयो । आईतबार प्रहरी नियन्त्रणमा रहेका ढकाललाई सोमबार जिल्ला अदालत चितवन लगिएको थियो ।

प्रहरी जवान ढकाल र सेनाका जवान कँडेलबीच विवाद भएपछि कँडेललाई प्रहरी नियन्त्रणमा लिईएपछि घटना भएको थियो । यसैबीच मृतकका आफन्तले सोमबार मुग्लिन बजारमा दुई घण्टा राजमार्ग अवरुद्ध गरेका छन् ।