ज्ञानेन्द्र शाहीलाई आक्रमण गर्ने एक पक्राउ, चारको खोजी

चितवन । ज्ञानेन्द्र शाहीमाथि आक्रमण गर्ने एक जनालाई प्रहरीले पक्राउ गरेको छ । जिल्ला प्रहरी कार्यालय चितवनका अनुसार भरतपुर महानगरपालिका वडा नम्वर ११ निवासी ३२ वर्षिय अविरल पोख्रेल पक्राउ परेका हुन ।

जिल्ला प्रहरी कार्यालय चितवनका डिएसपी शालिग्राम शर्मा पौडेलका अनुसार पोख्रेलललाई आईतवार साँझ पक्राउ गरिएको हो । पक्राउ परेका पोख्रेलमाथि अनुसन्धान सुरु गरिएको छ । घटनामा संलग्न अन्यको खोजी भईरहेको उहाँले बताउनुभयो ।

कात्तिक १ गते पीडितका तर्फबाट पाँच जना विरुद्ध किटानी जाहेरी परेपछि पोखरेललाई पक्राउ गरिएको हो । आरोपी अन्य चार जनाको खोजी कार्य जारी रहेको उहाँले बताउनुभयो ।

गत असोज ११ गते भरतपुर महानगरपालिका वडा नं. १० चौबीसकोठी स्थित होटल ग्लोबस अगाडि शाही लगायत उनका साथीहरुमाथि आक्रमण भएको थियो । आक्रममा शाही लगायत अन्य केही घाईते भएका थिए ।

नेपालका लागि नेपालीले आयोजना गरेको भ्रष्टाचार विरुद्ध अभियान कार्यक्रममा सम्बोधन गर्न आएका शाहीमाथि आक्रमण भएको हो । कार्यक्रमा स्थलको स्टेट समेत स्थानीय युवाहरुले भत्काएका थिए । कार्यक्रम स्थगन भएपछि नजिकै रहेको ग्लोबल होटलबाट बा ३ ख ८४५८ नम्बरको माइक्रोमा फर्कने क्रममा होटल परिररमानै शाहीमाथी आक्रमण भएको थियो ।

शाहीमाथि आक्रमण हुँदै गर्दाको फोटो र भिडियो समेत सार्वजनिक भएपनि प्रहरीले अभियुक्तहरुलाई पक्राउ गर्न सकेको थिएन ।