चितवनमा डेंगु संक्रमितको संख्या ४ हजार भन्दाबढी, मृत्यु हुनेको सङ्ख्या ३ पुग्यो

चितवन । चितवन जिल्लामा डेंगु संक्रमितको संख्या बढ्दै जाँदा मृत्यु हुनेको संख्या तीन पुगेको छ । यसै साता डेंगुका कारण थप एक जनाको मृत्यु भएको हो ।

स्वास्थ्य कार्यालय चितवनले डेङ्गुका कारण थप एकको मृत्यु भएको पुष्टि गरेको छ । कार्यालयले दिएको जानकारी अनुसार चितवन मेडिकल कलेजमा उपचाररत पूर्वी नवलपरासीको गैंडाकोटकी ३१ वर्षिया एक महिलाको मृत्यु भएको हो ।

कार्यालयका प्रमुख दिपक तिवारीका अनुसार ती महिलाको कात्तिक ४ गते बिहान उपचारको क्रममा मृत्यु भएको हो । यसअघि चालु आर्थिक वर्षमा एक जनाको डेङ्गु र एक जनाको डेङ्गु र स्क्रवटाईफस दुवै रोगको संक्रमणबाट मृत्यु भएको थियो । हालसम्म जिल्लाका स्वास्थ्य संस्थामा ज्वरो आएर उपचार गर्न आएका १३ हजार ८ सय ७७ जनाको डेङ्गु परीक्षण गर्दा ४ हजार २ सय ८० जनामा संक्रमण देखिएको छ ।

भदौको तेस्रो र अन्तिम साता अत्याधिक रुपमा देखा परेको डेङ्गुको संक्रमण दर क्रमशः घट्दै गएको कार्यालयले जनाएको छ ।