मर्यादित र नागरिक मैत्री बनाउने उदेश्यले भरतपुरमा तीन दिने पुर्नताजगी तालिम सुरु

चितवन, २८ माघ । भरतपुर महानगरपालिकाले न्याय क्षेत्रलाई थप मर्यादित र नागरिक मैत्री बनाउने उदेश्यले मेलमिलापसम्बन्धी तीनदिने पुर्नताजगी तालिम सुरु गरेको छ ।

महानगरपालिकाका २९ वटा वडाका मेलमिलापकर्ताहरुबाट नागरिकका गुनासो तथा सेवा प्रवाहलाई सुल्झाउन थप सहयोग पुगोस् भन्ने हेतुका साथ तालिमको आयोजना गरिएको हो ।

तालिमको उद्घाटन गर्दे महानगरका उपमेयर चित्रसेन अधिकारीले न्यायिक क्षेत्रमा भरतपुर महानगरपालिकालाई देश कै उत्कृष्ट बनाउने गरी काम भइरहेको उल्लेख गरे । देशका ७५३ स्थानीय तहहरु मध्येमा भरतपुर महानगरपालिकालाई उत्कृष्ट बनाउने लक्ष्यका साथ सेवा प्रवाह भइरहेको उनको दाबी छ ।

‘महानगरपालिकालाई नागरिकका गुनासो रहित बनाउने गरी काम भइरहेको छ’ उनले भने, ‘महानगरको न्यायिक समितिले अहिले आम नागरिकका पक्षमा वकालत गरिरहेको पनि जीकिर गरे । मेलमिलाप अहिलेको आवश्यकता हो’ उपमेयरले भने, ‘वडा तह बाटै मेलमिलाप नभएसम्म नागरिकहरुले न्यायको श्वास फेर्न सक्दैनन् ।’ उद्घाटन कार्यक्रममा सामान्य प्रशासन महाशाखा प्रमुख उपेन्द्रराज पौडयालले यस्ता खालका तालिमले नागरिकका गुनासोलाई फुकाउन मद्दत पु¥याउने बिश्वास व्यक्त गरे ।

तालिमलाई महानगरपालिकाले दुई चरणमा बिभाजन गरेर सुरु गरेको कानुनी मामिला शाखाका प्रमुख सुरज पौडेलले बताए । पहिलो चरणमा महानगरपालिकाको १० वटा वडाका मेलमिलाप कर्ताहरुको सहभागिता रहेको छ । वडा न ५, ६, ७,८,१०,११,१२,१३,१५ र २९ का मेलमिलाप कर्ताहरुले तालिममा भाग लिएका छन् । त्यस्तै दोस्रो चरणमा बाँकी रहेका वडाका मेलमिलाप कर्ताहरुलाई सहभागी गराइने छ । तालिममा कविता अधिकारी र बन्धुराज पौडेलले प्रशिक्षण दिनेछन् ।