खाली सिसिमा पनि ठेकेदार लगाएर कर उठाउँछ नगरपालिका

चितवन । चितवनको खैरहनी नगरपालिकाले दोहोरो कर लिएको भन्दै कवाड व्यवसायीहरुले विरोध गरेका छन् । आन्तरिक राजस्व कार्यालयलाई १३ प्रतिशत राजस्व तिरिरहेको अवस्थामा खैरहनी नगरपालिकाले समेत प्रत्येक सामानमा कर लिने गरेको भन्दै व्यव‘सायीहरुले विरोध गरेका हुन् ।

व्यवसायीहरुले दोहोरो कर बन्द गर, व्यावसायिक वातावरण सिर्जना गर जस्ता नारासहितको प्लेकार्ड बोकेर शनिबार विरोध प्रदर्शन गर्दै पर्सा बजार परिक्रमा गरेका छन् । चितवन कवाडी व्यवसायी संघका अध्यक्ष शंकर केसीका अनुसार नगरपालिकाबाट ठेक्का लिएर ठेकेदारले प्रति बोत्तल एक रुपैयाँ, प्रतिकिलो फलाममा दुई रुपैयाँ, प्रति किलो टिनमा एक रुपैयाँ शुल्क लिने गरेका छन् ।

कवाड व्यवसायीले सरकारलाई भ्याट, नगरपालिकालाई व्यावसायिक कर तथा साना तथा घरेलु उद्योग कार्यालयमा पनि कर तिर्दा समेत नगरपालिकालाई थप कर तिर्नुपरेपछि आफूहरुले व्यवसाय गर्ने वातावरण नभएको केसीले बताए । नगरपालिकाबाट ठेकेदारले उठाउने शुल्क खारेज हुनुपर्ने केसीको भनाइ छ ।

व्यवसायी सुधामा साहले ट्रकमा सामान लोड गरेर पठाउँदा आफूले ठेकेदारलाई छुट्टै कर तिरेको गुनासो गरे । १० टन फलाम बिक्री गर्दा १३ प्रतिशत कर राजस्वमा बुझाए पनि नगरपालिकालाई छुट्टै २० हजार रुपैयाँ शुल्क बुझाउन बाध्य भएको साहले बताए । आफूहरु दोहोरो करको मारमा परेको भनेर खैरहनी नगरपालिकामा जाँदा समेत हप्काइ खानुपरेको व्यवसायीहरुको गुनासो छ ।