पत्रकार रमेशकुमार पौडेललाई ‘चितवन थारुरत्न’ सम्मान

चितवन, ५ असोज । कान्तिपुरका चितवन संवाददाता रमेशकुमार पौडेलाई थारु कल्याणकारिणी सभा (थाकस) चितवनले ‘चितवन थारुरत्न’ ले सम्मान गरेको छ । थाकस चितवनको शुक्रबारबाट सुरु भएको १३ औं जिल्ला अधिवेशनमा पौडेललाई कार्यक्रमका प्रमुख अतिथि रहेका थाकस केन्द्रीय सभापति धनिराम चौधरी, माडी नगरपालिकाका मेयर ताराकुमारी काजि महतो लगायतले सम्मान गर्नुभएको हो ।

चितवनका आदिवासी थारु समुदायको अधिकारदेखि साँस्कृतिक सहन सहन र समस्याका विषयमा निरञ्तर कलम चलाउँदै आउनु भएका कारण पत्रकार पौडेललाई थारुरत्न सम्मान प्रदान गरेको थाकस चितवनका अध्यक्ष ललितकुमार चौधरीले बताउनुभयो । पौडेल दुई दशकदेखि चितवनमा पत्रकारिता गर्दै आउनु भएको छ ।

कार्यक्रममा चितवनका अर्का पत्रकार कारी चौधरीसहित शिक्षा, समाज सेवा, कानुनी सेवा लगायतका विषयमा काम गर्दै आएका व्यक्तिहरुलाई पनि सम्मान गरिएको थियो ।

थाकसका पुर्व जिल्ला अध्यक्ष टिकेन्द्र चौधरीले थारु समुदायको साँझा जातीय संस्थाका रुपमा विस २००५ मा केन्द्रमा खुलेको यो संगठन चितवनमा २०१८ सालमा स्थापना भएको जानकारी दिनुभयो । चितवनका आदिवासी भइकन पनि थारु समुदाय राजैतिक र अन्य क्षेत्रमा पछाडी पार्ने काम भइरहेको उहाँको दुखेसो थियो । शनिबार सकिने अधिवेशनले थाकसको नयाँ कार्य समिति चयन गर्ने छ ।