मदन जयन्तीमा चितवनका जनप्रतिनिधिलाई एमाले उपमहासचिव ज्ञवालीले प्रशिक्षण दिने

चितवन, १२ असार । जननेता मदन भण्डारीको ७१ औँ जन्मजयन्तीका अवसरमा चितवनका जनप्रतिनिधिहरुलाई जनताको बहुदलीय जनवादबारे प्रशिक्षण दिईने भएको छ । मदन भण्डारी फाउण्डेशन चितवनको आयोजना र नेकपा (एमाले) चितवनको समन्वयमा यही असार १४ गते प्रशिक्षण दिन लागिएको हो ।

फाउण्डेशन चितवनका अध्यक्ष डा. तिलचन्द्र भट्टराईका अनुसार १४ गते बिहान ११ बजे जिल्ला समन्वय समितिको सभाहलमा “जनताको बहुदलीय जनवाद र जनप्रतिनिधिको भूमिका” विषयक अन्तक्र्रियात्मक प्रशिक्षण कार्यक्रम हुने छ । कार्यक्रममा नेकपा (एमाले) का उपमहासचिव प्रदिप ज्ञवाली प्रमुख वक्ताको रुपमा रहनु हुने उहाँले जानकारी दिनुभयो ।

कार्यक्रममा जिल्लाभरका नेकपा (एमाले) का जनप्रतिनिधिहरुलाई सहभागी गराईने छ । कार्यक्रममा जिल्ला समन्वय समिति चितवन र सात वटै पालिकाका एमालेका तर्फबाट उम्मेदवार रहनु भएका प्रमुख, उपप्रमुख, वडाअध्यक्ष, वडा सदस्य, कार्यपालिका सदस्यहरु लगायत एमाले नेता कार्यकर्ताहरुको सहभागी हुनुहुनेछ ।

प्रशिक्षणात्मक अन्तक्र्रिया कार्यक्रममा विगतमा जनप्रतिनिधि भएर काम गरिसक्नु भएका नेताहरुको अनुभव, कमिकमजोरी, वर्तमान अवस्थामा जनअपेक्षा र त्यसको सम्बोधन, जबजले देखाएको बाटोका बारेमा प्रशिक्षण दिईने छ ।

मदन जयन्तीको अवसरमा पारेर फाउण्डेशन चितवनले वृक्षारोपण, विगत वर्षमा रोपिएका विरुवाहरुको गोडमेल लगायतका क्रियाकलाप गर्ने कार्यक्रम रहेको फाउण्डेशनका बरिष्ठ उपाध्यक्ष शम्भु सुवेदीले जानकारी दिनुभयो ।

नेकपा (एमाले) का तत्कालिन महासचिव भण्डारीको यही असार १४ गते जन्मजयन्ती परेको छ । विसं २०५० जेठ ३ गते भण्डारी र संगठन विभागका तत्कालिन प्रमुख जीवराज आश्रितको पोखराबाट चितवनको कार्यक्रममा आउने क्रममा दासढुङ्गामा रहस्यमय जीप दुर्घटनामा परी निधन भएको थियो ।