“भरतपुरमा अन्तर्राष्ट्रियस्तरमै चर्चा हुने गरी खेलकुदको विकास गर्नुपर्छ”

भरतपुर,९ असार । भरतपुर महानगरपालिकाका उप प्रमुख चित्रसेन अधिकारीले राष्ट्रिय तथा अन्तराष्ट्रिय स्तरमै चर्चा हुने गरि खेलकुदको बिकास गर्नु पर्ने बताएका छन् ।

भरतपुर महानगरपालिका नगर खेलकुद बिकास समितिलेको आयोजनामा आजदेखि गुन्जनगरमा सुरु भएको महानगर स्तरीय तेस्रो राष्ट्रपति रनिङ शिल्ड प्रतियोगिता मा बोल्दै उनले सो कुरा बताएका हुन् ।

उनले भरतपुर महानगरले खेलकुद क्षेत्रलाइ प्राथमिकतामा राखेको पनि बताए । ‘अब महानगरको खेलकुदलाई तपाई हामी सबै मिलेर राष्ट्रिय तथा अन्तराष्ट्रिय स्तरमै चर्चा हुने खालको बनाउन जरुरी छ’, उनले भने । उप-प्रमुख अधिकारीले यस्ता प्रतियोगिताहरुले खेलाडीहरुमा थप हौसला प्रदान गर्ने भन्दै निरन्तर रुपमा खेल सञ्चालनमा जोड दिए ।

प्रतियोगितामा एक सय मिटर देखि १६ सय मिटर सम्मको दौड, उसु, तेक्वान्दो, भलिबल, कराते, हाइजम्प, ज्याभ्लिन थ्रो, लङजम्प, कबड्डीलगायतका खेल हुन्छन् । असार ९ देखि ११ गतेसम्म चल्ने प्रतियोगितामा सामुदायिक र संस्थागत तर्फका माध्यामिक विद्यालयको सहभागिता रहेको छ ।