मंगलपुर सहकारीको अध्यक्षमा सापकोटा

चितवन । मंगलपुर बचत तथा ऋण सहकारी संस्थाको सञ्चालक समितिमा क्षेत्रप्रसाद सापकोटा पुनः अध्यक्ष चयन भएका छन् ।

सहकारीको शुक्रबार सम्पन्न भएको साधारण सभा तथा अधिवेशनले आगामी दुई वर्ष थप कार्यकाल रहने गरि यसअघिकै सञ्चालक समितिलाई निरन्तरता दिएपछि सापकोटा पुनः अध्यक्ष भएका हुन् ।

सहकारी ऐन २०६४ अन्तर्गत दुई वर्ष कार्यकाल रहने गरी २०७४ सालमा सापकोटाको नेतृत्वमा ११ सदस्यीय सञ्चालक समिति चयन भएको थियो । उक्त समितिको कार्यकाल नसकिँदै २०६४ सालको सहकारी ऐन विस्थापित भएर सहकारी ऐन २०७४ पारित भयो ।

उक्त ऐनले सहकारी संस्थाको कार्यअवधीलाई ४ वर्ष बनाएको थियो । सोही ऐन अनुसार २ वर्ष कार्यकाल थप हुनेगरी सापकोटा सहित ११ जनाकै सञ्चालक समिति र ३ सदस्यीय लेखा समितिको कार्यकाल अधिवेशनले थपेको सञ्चालक समितिका सदस्य विष्णुमाया पाण्डेले जानकारी दिइन् ।

सञ्चालक समितिको उपाध्यक्षमा बाबुराम परियार, सचिवमा रामशरण पण्डित र कोषाध्यक्षमा तुलसी न्यौपाने रहेका छन् ।

साधारण सभाले आर्थिक प्रतिवेदन, प्रगती प्रतिवेदन तथा भावी योजना तथा कार्यक्रम पनि पास गरेको छ । साधारण सभाको उद्घाटन भरतपुर महानगरपालिकाका उपप्रमुख पार्वती शाहले गरेकी थिइन् । सो अवसरमा उत्कृष्ट बचतकर्ता, ऋणी तथा एसईई तथा अन्य कक्षामा उत्कृष्ट अंक सहित उत्तीर्ण हुने सहकारीका सदस्यका छोराछोरीलाई पनि नगदसहित सम्मान गरिएको थियो ।