संस्थागत र सामुदायिक विद्यालय माथिको विभेद अन्त्य हुनुपर्छ : उप-प्रमुख अधिकारी

भरतपुर,२८ जेष्ठ – भरतपुर महानगरपालिका उप-प्रमुख चित्रसेन अधिकारीले संस्थागत र सामुदायिक विद्यालय माथिको विभेद अन्त्य हुनुपर्ने बताएका छन् । संस्थागत र सामुदायिक विद्यालयमा कुनै न कुनै बाहनामा विभेद हुँदै आएका तत्काल यसको अन्त्य अन्त्य हुन पर्नेमा उप-प्रमुख अधिकारीले जोड दिएका हुन् ।

भरतपुर महानगर प्याब्सनले आज (शुक्रबार) आयोजना गरेको नवनिर्वाचित जनप्रतिनिधिहरुलाई सम्मान कार्यक्रममा बोल्दै उनले संस्थागत र सामुदायिक विद्यालयमा हुने गरेका विभेद अन्त्य गर्न आफुले सक्दो सहयोग गर्ने प्रतिवद्धता जनाए । उनले देश आत्मनिर्भर बन्न गुणस्तरिय शिक्षाको आवश्यकता रहेको पनि औंल्याए ।

‘शिक्षा बिना देशको भविष्य अन्धकार छ, अधिकारीले भने,’एउटा व्यक्तिदेखि लिएर समाज, समुदाय, राष्ट्रलाई सुधार्न पनि शिक्षा आवश्यक छ ।’ मानव जीवनसँग शिक्षाको सम्बन्ध जोडिएको भन्दै जीवनको जति मूल्य छ त्यतिनै शिक्षाको पनि मूल्य हुने उनको भनाइ थियो ।

कार्यक्रममा प्याब्सन भरतपुरका अध्यक्ष लेखनाथ खनाल, सल्लाहकार श्रीप्रसाद ढुङगना, प्याब्सनका केन्द्रिय सदस्य मोहन लामा, संस्थागत विद्यालय अर्गनाइजेसन संघ भरतपुरका अध्यक्ष भोजराज न्यौपाने, संस्थागत विद्यालय शिक्षक यूनियन चितवनका अध्यक्ष जनकराज घिमिरे लगायतले मन्तव्य राखेका थिए ।