राष्ट्रिय सभामा पार्वती रावलको प्रश्नः भरतपुर अस्पताले केन्द्रीय अस्पतालको सेवा कहिले पाउँछ ?

काठमाण्डौं । राष्ट्रिय सभा अन्तर्गतको राष्ट्रिय सरोकार समितिकी सभापति दिलकुमारी रावल ‘पार्वती’ले भरतपुर अस्पताललाई तत्काल केन्द्रीय अस्पतालको सेवा सुविधा दिन माग गर्नुभएको छ । आज बुधबारको सभाको बिशेष समयमा बोल्दै उहाँले सरकारले भरतपुर अस्पताललाई कन्द्रीय अस्पताल घोषणा गरेपनि अहिलेसम्म अस्पतालले नागरिकलाई केन्द्रीय अस्पतालको सेवा सुविधा दिन नसकेको बताउनुभयो ।

उहाँले भन्नुभयो “केन्द्रीय अस्पताल घोषणा गरेदेखि अहिलेसम्म ओएनएम सर्भे भएको छैन्, केन्द्रीय अस्पतालमा उपचार गर्न आउने बिरामीलाई आवश्यक पर्ने भौतिक पूर्वाधार, दक्ष जनशक्ति, उपचारमा प्रयोग हुने उपकरणहरु जिल्ला अस्पताल सरहको छ ।” उहाँले वीर अस्पताल पछि सबैभन्दा धेरै बिरामी उपचारका लागि आउने अस्पताल भरतपुर अस्पताल भएपनि त्यस अनुसारको सेवा सुविधा प्रदान गर्न नसकिएको भन्दै सरकार मार्फत स्वास्थ्य मन्त्रालयको ध्यानाकर्षण गराउनुभयो ।

दैनिक १२ सयदेखि २ हजारसम्म बिरामी चितवन आसपासका १९ जिल्लाबाट उपचारका लागि भरतपुर अस्पताल आउने गरेको उहाँले बताउनुभयो । “भरतपुर अस्पतालमा सरकारी चिकित्सक र कर्मचारी जम्मा १ सय ५० जना छन, उहाँले भन्नुभयो “४ सय ५० भन्दा बढि विकास समितिका कर्मचारीको भरमा अस्पताल छ ।” उहाँले विकास समितिका कर्मचारीहरुले नियुक्ती विनानै काम गरिरहेको भन्दै सरकारको ध्यानाकर्षण गराउनुभयो । उहाँले अस्पताल विकास समिति सक्रिय नभएको भन्दै तत्काल सम्बोधन गर्न माग गर्नुभयो ।

सभापति रावलले चितवनका अस्पतालमा ज्वरो र डेङगुका विरामी बढेको भन्दै तत्काल टोलटोलमा डेङगु सार्ने लामखुट्टेको बासस्थान खोजी गरी लार्भा नष्ट गर्ने अभियान तिब्र पार्नु माग गर्नुभयो । उहाँले चितवनमा सबैभन्दा धेरै डेङगुका बिरामी भएकाले सरकारले चितवनलाई विशेष ध्यान दिनुपर्नेमा जोड दिनुभयो ।