निर्माण व्यवसायी संघको अध्यक्षमा काँग्रेस निकट कँडेल बिजयी, पदाधिकारीमा बामपन्थीको बर्चश्व

चितवन । निर्माण व्यवसायी संघ, चितवनको अध्यक्षमा उमानन्द कँडेल बिजयी भएका छन् । अध्यक्षका अर्का प्रत्यासी छवि गौतमलाई तेब्बर भन्दा बढी मतान्तरले हराउँदै कँडेल बिजयी भएका हुन् । शुक्रबार राति सम्पन्न मतगणनामा कँडेलले दुई सय चार मत पाए भने गौतमले ६८ मत मात्रै पाए ।

१३६मत अन्तरले बिजयी कँडेल नेपाली काँग्रेस निकट छन् भने गौतम नेपाल कम्युनिष्ट पार्टी (नेकपा) निकटका व्यवसायी हुन् । संघको प्रथम उपाध्यक्ष, द्धितीय उपाध्यक्ष, महासचिवलगायत महत्त्वपूर्ण पदाधिकरीमा भने बामपन्थी प्यानलका उम्मेदवार बिजयी भएका छन् ।

त्यसैगरी द्धितीय उपाध्यक्षमा काँग्रेस निकटका भिष्म अधिकारीलाई पराजित गर्दै बाम प्यानलका दिनेशचन्द्र न्यौपाने विजयी भएका छन् । न्यौपानेले १५४ मत रअधिकारीले ११६ मत प्राप्त गरे । सचिवमा झिनो मतान्तरले पुष्कर अधिकारी विजयी भएका छन् । अधिकारीले १३६ मत प्राप्त गरे भने उनका निकटम प्रतिद्वन्द्वी राजेन्द्रकुमार श्रेष्ठले १३२ मत ल्याए ।

त्यसैगरी संघको सह–कोषाध्यक्षमा ताराप्रसाद दुवाडी विजयी भएका छन् । दुवाडीले १६० मत प्राप्त गरे भने निकटम प्रतिद्वन्द्वी बाबुराजा सिंहले १११ मत प्राप्त गरे । खुल्ला सदस्यमा सहदेव उप्रेती, संजय न्यौपाने, शिवलाल ढकाल, प्रकाश तिवारी, दीपक अधिकारी, विष्णु प्रसाद लामिछाने, दीपक पाठक र पिताम्बर बास्तोला विजयी भएका छन् । ८ जना खुला सदस्यका लागि १६ जनाबीच प्रतिस्पर्धा भएको थियो। कूल २८४ जना मतदातामा २७८ मत खसेको थियो ।

प्रथम उपाध्यक्षमा केशवप्रसाद लामिछाने, महासचिवमा पुस्तक अधिकारी र कोषाध्यक्ष कमलराज आचार्य निर्विरोध निर्वाचित भएका थिए । महिला सदस्यमा रोजिना भट्टराई निर्विरोध निर्वाचित भएकी छिन् ।