काँग्रेस चितवनले शुरु गर्यो दोस्रो चरणको जागरण अभियान

चितवन । नेपाली काँग्रेस चितवनले आजदेखि जिल्लामा दोस्रो चरणको जागरण अभियान शुरु गरेको छ । काँग्रेसले जिल्लाका सवै प्रदेश स्तरका क्षेत्रहरुमा जागरण अभियान शुरु गरेको हो । पार्टीको केन्द्रिय कार्यसमितिको निर्देशन अनुसार जिल्लाका संसदीय क्षेत्रअन्तर्गत प्रदेश सभाका निर्वाचन क्षेत्रहरुमा आज एकैसाथ अभियान शुरु गरिएको नेपाली काँग्रेस चितवनले जनाएको छ ।

१ सय ६ औँ बिपि जयन्तीको अवसर पारेर चितवनका प्रत्येक निर्वाचन क्षेत्रमा एक सय ६ वटा विरुवा गरि जिल्लामा ६ सय ३६ वटा विरुवा रोपेर कार्यक्रमको शुरुवात गरेको हो । जागरण अभियानका लागि केन्द्रले पठाएका प्रतिनिधि र जिल्लाले तोकेका प्रतिनिधिहरुसहित सवै क्षेत्रमा एकै साथ कार्यक्रम गरिएको काँग्रेस चितवनका सभापति जीतनारायण श्रेष्ठले जानकारी दिनुभएको छ ।

नेपाली काँग्रेस केन्द्रीय कार्यालयले चितवन प्रतिनिधिसभा क्षेत्र नम्वर १(क) मा नवराज महत, (ख) प्रेमबहादुर खड्का, २ (क) मा गणेशमान चक्रधर, (ख) मा रामचन्द्र माईकल, ३ (क) मा धर्मराज अर्याल, (ख) मा धनलक्ष्मी श्रेष्ठलाई प्रतिनिधिको रुपमा खटाएको छ । अभियानका प्रतिनिधिहरुले कार्यक्रमको उद्घाटनका क्रममा पार्टीलाई अहिलेको अवस्थाबाट पुरानो बलियो अवस्थामा फर्काउनका लागि अभियान प्रभावकारी बन्ने विश्वास व्यक्त गर्नुभएको थियो ।

बिपिको जन्म जयन्तिको अवसरमा विरुवा रोप्दा जस्तो खटाई अन्य समयमा पनि हुन आवश्यक रहेको उहाँहरुको भनाई थियो । काँग्रेसले सञ्चालन गरेको जागरण अभियानले पार्टी भित्रका आन्तरिक विवादको समेत अन्त्य गर्ने उहाँहरुले बताउनु भयो । निर्वाचनमा देखिएका तिक्तताहरुको अन्त्य गर्दै काँग्रेसलाई बलियो बनाउन र काँग्रेसले हालसम्म गरेका काम र आगामी दिनमा गर्नुपर्ने कामका विषयमा आम कार्यकर्ताहरुलाई जानकार गराउनु अहिलेको आवश्यकता रहेको अभियानका प्रतिनिधिहरुको भनाई थियो ।

नेपाली काँग्रेस चितवनका सचिव उत्तम जोशीका अनुसार असोज ७ गनेसम्म सञ्चालन हुने सो अभियानका लागि जिल्ला पार्टीले प्रतिनिधिसभा क्षेत्र नम्वर १ प्रदेश (क) मा जिल्ला सह सचिव सूर्य अर्याल, (ख) मा जिल्ला सचिव राजिव न्यौपाने, प्रतिनिधि सभा क्षेत्र नम्वर २ प्रदेश (क) मा जिल्ला सचिव उत्तम जोशी, (ख) मा प्रवक्ता निता ढकाल, प्रतिनिधि सभा क्षेत्र नम्वर ३ प्रदेश (क) मा जिल्ला कोषाध्यक्ष शङ्कर कँडेल र (ख) मा जिल्ला उपसभापति कैलाश कोईरालालाई जिम्मा दिएको छ ।

अभियानका क्रममा प्रदेश क्षेत्रमा तीन सय युवालाई अहिलेसम्मका आन्दोलन र यसबाट प्राप्त उपलव्धि, बिपिको विचार लगायतका विषयमा प्रशिक्षित गराउने, नागरिक सम्वाद कार्यक्रम गर्ने, युवा केन्द्रित विशेष सम्वाद, अन्तरक्रिया, अग्रज, सहिद परिवार र द्वन्द्व पीडितहरुकोमा घरदैलो, नयाँ सदस्यता वितरण, स्थानीय तहहरुको दुई वर्षको समीक्षा लगायतका कार्यक्रम रहेका सचिव जोशीले जानकारी दिनुभयो ।

जिल्ला सभापति जीतनारायण श्रेष्ठका अनुसार अभियानका क्रममा हुने कार्यक्रमहरुको सूचना सम्प्रेषणका लागि जिल्ला सदस्य डा. ईश्वरी लौडारीको संयोजकत्वमा पाँच सदस्यीय उपसमिति गठन गरिएको छ ।

जागरण अभियान महङ्गी, भ्रष्टाचार, अलोकतान्त्रिक विधेयक, कम्युनिष्ट सरकारको कुशासन, बढ्दो महिला हिंसा, बलात्कार तथा हत्या लगायतका विषयमा केन्द्रित हुने श्रेष्ठले जानकारी दिनुभयो । अभियानको क्रममा जिल्ला स्तरमा स्थानीय तहहरुले गरेको कर वृद्धि देखि विकास निर्माणका क्रममा भएका अनियमितताका विषयमा पनि छलफल हुने सचिव जोशीले जानकारी दिनुभयो ।

जिल्ला सभापति श्रेष्ठका अनुसार जिल्लामा समापनको दिन विरोध प्रदर्शन सहितको कार्यक्रम हुने छ । नेपाली काँग्रेसले पहिलो चरणको जागरण अभियान गत वैशाख २५ गते देखि जेठ २५ गते सम्म देशव्यापी रुपमा सम्पन्न गरेको थियो ।